Die lewende water

Teksgedeelte: Joh 4:1-14

Joh 4:1 Toe die Here dan verneem dat die Fariseërs gehoor het dat Jesus meer dissipels maak en doop as Johannes—

2 alhoewel Jesus self nie gedoop het nie, maar sy dissipels—

3 het Hy Judéa verlaat en weer na Galiléa gegaan.

4 En Hy moes deur Samaría gaan.

5 Hy kom toe by ‘n stad van Samaría wat Sígar genoem word, naby die stuk grond wat Jakob aan sy seun Josef gegee het.

6 En die fontein van Jakob was daar. Jesus het toe, omdat Hy moeg was van die reis, somaar by die fontein gaan sit. Dit was omtrent die sesde uur.

7 Daar kom ‘n vrou uit Samaría om water te skep. Jesus sê vir haar: Gee vir My water om te drink—

8 want sy dissipels het na die stad gegaan om voedsel te koop.

9 En die Samaritaanse vrou sê vir Hom: Hoe is dit dat U wat ‘n Jood is, van my vra om te drink terwyl ek ‘n Samaritaanse vrou is? Want die Jode hou geen gemeenskap met die Samaritane nie.

10 Jesus antwoord en sê vir haar: As jy die gawe van God geken het en geweet het wie Hy is wat vir jou sê: Gee vir My water om te drink, sou jy Hom gevra het en Hy sou vir jou lewende water gegee het.

11 Die vrou sê vir Hom: Here, U het nie eens ‘n skepding nie, en die put is diep; waarvandaan kry U dan die lewende water?

12 U is tog nie groter as ons vader Jakob nie, wat die put aan ons gegee het en self daaruit gedrink het, en sy seuns en sy vee?

13 Jesus antwoord en sê vir haar: Elkeen wat van hierdie water drink, sal weer dors kry;

14 maar elkeen wat drink van die water wat Ek hom sal gee, sal in ewigheid nooit dors kry nie, maar die water wat Ek hom sal gee, sal in hom word ‘n fontein van water wat opspring tot in die ewige lewe.

Julle sal onthou toe ons in die verlede na die evangelie van Johannes gekyk het, het ons gesê dat die enkele doel van Johannes is om Christus te beskryf as God was mens geword het.  God in ‘n menslike liggaam.

Die sleutel van Johannes hoofstuk 4 is v26 waar Jesus sê vir die Samaritaanse vrou sê, “Dit is Ek wat met jou spreek!”, maw “Ek is die Messias.”  En wanneer ons hoofstuk 4 lees is die fokus nie hier op die Samaritaanse vrou nie.  Die fokus is nog altyd Jesus.  God in ‘n menslike liggaam.

Dit is ook interessant om te sien dat Jesus nie gepla was oor die tipe persoon waarmee Hy te doen het nie.  Hy was lief vir alle mense.  Hy was nie kieskeurig nie.  Hy het nie gunstelinge gehad nie.  God is geen aannemer van die persoon nie.

En in hierdie gedeelte sien ons hoe Hy in liefde deel met ‘n vrou wat vir ander ‘n totale uitgeworpene was.  Vir Hom was dit nie ‘n probleem om met haar te deel nie, want Sy liefde word nie bepaal deur die objek wat Hy lief het nie.  Sy liefde word bepaal deur die karakter van Sy liefde.  En dit is die verskil tussen die mens se liefde en goddelike liefde.

Menslike liefde sê, “Ek is lief vir jou, want ek hou van wie of wat jy is.”  Goddelike liefde sê, “Ek is lief vir jou, maak nie saak wie of wat jy is nie, want dit is die karakter van liefde.”  God het lief, want dit is liefde, dit is Sy karakter, om lief te hê.  God se liefde is nie oordeelkundig nie.

Ons het dan ook hier in ons teksgedeelte met ‘n baie interessante persoon te doen.  Ons het egter nie baie besonderhede van haar lewe nie.  Wat ons wel weet is dat sy met mans deurmekaar was.  En dit is al wat ons hier hoef te weet, want dit was ‘n illustrasie van haar sonde.

Sy was ‘n Samaritaan, net die teenoorgestelde van Nikodemus wat ‘n Jood was.  Sy was ‘n vrou en Nikodemus was ‘n man.  Sy was ‘n uitgeworpene, Nikodemus was ‘n geleerde.  Sy was laer klas en Nikodemus ‘n hoër klas.  Sy was arm en swak, Nikodemus was ryk.

Nikodemus het Jesus erken en gesê, “Rabbi, ons weet dat U ‘n leraar is wat van God gekom het, want niemand kan hierdie tekens doen wat U doen as God nie met hom is nie.”  Maar sy het nie geweet wie Jesus was nie.

Twee totaal en al verskillende mense.  Maar Jesus lei hierdie vrou tot kennis van Homself.  Want dit gaan alles oor Hom.  Dit gaan alles oor Jesus Christus.  Dit openbaarmaking van die Messias.  Dit is wat saak maak.

Terloops, dit is die eerste keer wat Jesus Homself as die Messias bekend stel, en dit nog aan ‘n onbekende vrou van Samaria.  En baie het gevra waarom het nie Hy eerder nie net na Jerusalem toe gegaan, na die tempel en vir die leiers daar gaan vertel wie Hy was nie.  Hoekom openbaar Hy Homself aan ‘n onbekende vrou?

Wel, God se gedagtes is nie ons gedagtes nie, maar wat ons wel weet is dat God verkies het om nie dit aan die verstandige mense en wyse te openbaar nie, maar aan die kindertjies.  En toe Hy uiteindelik dit aan Israel geopenbaar het, het hulle in elk geval nie geglo nie.

Vers 1-6 gaan dan oor die omstandighede wat gelei het tot hierdie konfrontasie.

Joh 4:1 Toe die Here dan verneem dat die Fariseërs gehoor het dat Jesus meer dissipels maak en doop as Johannes—

2 alhoewel Jesus self nie gedoop het nie, maar sy dissipels—

3 het Hy Judéa verlaat en weer na Galiléa gegaan.

So, daar is ‘n storie wat soos ‘n veldbrand versprei het, dat Jesus baie suksesvol was.  Baie mense het na Jesus toe gegaan.    Hy het meer dissipels gehad as Johannes die Doper.  En Johannes die Doper se dissipels kon dit nie verstaan nie.  Waarom sou hulle Johannes verlaat en na Jesus toe gaan.  En julle onthou wat Johannes gesê het, “Hy moet meer word, maar ek minder.”

Johannes sê inderwaarheid, dit is veronderstel om so te wees.  Hulle moet na Hom toe gaan.  Dit is wat ek kom doen het.  Net om die weg van die Here in die woestyn te berei.  Dit gaan oor Hom.  En dit gee my vreugde.

Joh 3:28 Julle is self my getuies dat ek gesê het: Ek is nie die Christus nie; maar dat ek voor Hom uitgestuur is.

29 Hy wat die bruid het, is die bruidegom; maar die vriend van die bruidegom wat na hom staan en luister, verbly hom baie oor die stem van die bruidegom. So is dan hierdie blydskap van my volkome.

Die skare het na Jesus toe gegaan en dit het die Joodse leiers ontstel.  Hulle het eers nie van Johannes gehou nie en nou nog minder van Jesus.  Hoe weet ek dat hulle nie van Johannes die Doper gehou het nie?  In Markus 6 lees ons dat hulle het sy kop afgekap en hulle was bly daaroor.  Vir die Joodse leiers was dit ‘n groot dag.

In hulle oë het hulle ontslae geraak van die godsdienstige afvalligheid.  As daar enigiets was wat ontoelaatbaar was, was dit iemand wat die waarheid verkondig het in die midde van valsheid.  Dit is juis as gevolg van hulle geveinsdheid dat hulle nie iemand wat die waarheid verkondig het kon verdra nie.

Johannes die Doper was iemand wat die waarheid verkondig het.  En as hulle nie van hom gehou het nie, wat het hulle nie van Jesus gedink nie?  Hulle was voortdurend in konflik met Jesus totdat hulle Hom uiteindelik dood gemaak het.

En toe Jesus verneem dat die fariseërs gehoor het van al die mense wat na Hom toe gekom het, het Hy na Galilea gegaan.  Hoekom?  Was Hy bang vir hulle?  Nee!  Kon Hy hulle nie face nie?  Nee!  Dit was eenvoudig nie God se tyd dat Hy in konfrontasie met hulle moes kom nie.  Dit was nie die regte tyd nie.  Daarom het Hy gegaan.

Jesus het ook nie net weggegaan om weg te kom van die fariseërs af nie.  Hy moes na Samaria toe gaan, want dit was ‘n goddelike noodsaaklikheid.  Hy het gegaan na Samaria, want daar het Hy ‘n goddelike afspraak gehad met ‘n vrou.

‘n Ou kon sê dat Jesus moes deur Samaria gaan om na Galilea toe te gaan.  Dit sou die korste en maklikste pad gewees het.  Maar die Jode het eenvoudig net nie deur Samaria gegaan nie.  Die Jode het ‘n ander roete gehad.  Hulle wou nie hulle voete in Samaria sit nie.

Jode en Samaritane wou niks van mekaar af weet nie.  Hulle het mekaar gehaat.  Maar Jesus het deur Samaria gegaan.  Maar hoor wat sê vers 4,

Joh 4:4 En Hy moes deur Samaría gaan.

Dit was ‘n goddelike noodsaaklikheid.  In God se raadsplan was dit so dat die Verlosser deur Samaria moes gaan, want Hy het ook ‘n afspraak gehad met sondaars daar.  God se genade het ook begin om te verskuif na heidene.  God se guns het begin swaai na die heidene.

Joh 4:5 Hy kom toe by ‘n stad van Samaría wat Sígar genoem word, naby die stuk grond wat Jakob aan sy seun Josef gegee het.

6 En die fontein van Jakob was daar. Jesus het toe, omdat Hy moeg was van die reis, somaar by die fontein gaan sit. Dit was omtrent die sesde uur.

Jesus het ook op die regte tyd daar opgedaag.  As Hy twee ure later daar aangekom het, sou daar geen vroue daar aangekom het nie.  Maar God is altyd op tyd.  God se skedule is nooit verkeerd nie.  Sy goddelike tydsberekening was perfek.

Jesus was moeg en het daar by die fontein gaan sit.  Hoekom?  Want Hy was in God se plek op God se tyd om God se wil te doen.  En dit is ‘n ongelooflike gedagte.  Luister!  Dit is wat God van elke gelowige wil hê, dat ons God se man sal wees in God se plek op God se tyd om Sy wil te doen.

Die hartseer is dat meeste van ons wil wees waar ons wil wees, wanneer ons daar wil wees met die doel om dit te doen wat ons wil doen.  So min Christene is sensitief vir die Gees van God om te hoor wat God wil hê ons moet doen op die regte plek op die regte tyd.

So hoe weet ek dan wanneer God wil hê ek moet iewers op ‘n plek iets vir Hom doen?  Die vraag is, as God wil hê jy moet iets vir Hom doen, dink jy nie Hy sal jou laat weet nie?  God sal jou laat weet!  Al hoekom ek nie sou weet wanneer God wil hê ek moet iets doen nie, is omdat ek te besig is om my eie dinge te doen en nie sensitief is vir die Heilige Gees nie.

Dit gaan alles oor beskikbaarheid.  Die meeste van ons is nie beskikbaar nie.  Ons is te besig met ons eie lewens.  Ons moet net beskikbaar wees.

Joh 4:7 Daar kom ‘n vrou uit Samaría om water te skep. Jesus sê vir haar: Gee vir My water om te drink—

8 want sy dissipels het na die stad gegaan om voedsel te koop.

Die fontein waar Jesus sit is ‘n halwe myl uit die dorp van Samaria uit.  En daar was genoeg water in die dorp.  Waarom sou sy dan so ver loop vir water as daar water in die dorp is?  Heel waarskynlik as gevolg van haar agtergrond en dalk wou die ander vroue haar nie daar gehad het nie. 

Sy sê ook later vir Jesus, “Here, gee my daardie water, sodat ek nie dors kry en hier hoef te kom skep nie.”

Jesus praat oor die geestelike water en sy praat van fisiese water.  Maar sy was ‘n uitgeworpene, verstoot deur die samelewing.  Daarom kom sy ‘n half myl om water te kry.  Jesus sê toe vir haar, “Gee vir My water om te drink”.  Hoekom?  V8, want sy dissipels was in die stad om kos te koop.

Die vraag is tog:  Hoekom kry Jesus nie vir Homself water nie?  Want Hy het nie ‘n skepding gehad nie.  Dit is waarom die vrou vir Jesus sê, “Here, U het nie eens ‘n skepding nie, en die put is diep; waarvandaan kry U dan die lewende water?”

En ek wonder wat hierdie vrou gedink het toe sy hoor dat die dissipels in die Samaritaanse stad is om kos te kry.  Kan jy jou indink aan die skok van die Samaritane toe ‘n klein groepe Jode in hulle stad kom.  Hulle het seker gedink hierdie ouens is mal.  Hulle haat ons dan.

Dit vertel ons ook iets mooi, dat in die paar maande wat die dissipels saam met Jesus was, Hy hulle reeds iets geleer het van Sy liefde wat nie grense het nie.  Hulle was in die dorp en die Bybel sê nie vir ons wat gebeur het nie, maar dit sou nogals ‘n interessante storie gewees het.

Terug by die put vra Jesus die Samaritaanse vrou vir water en dit moes haar natuurlik gerattle het.  Eerstens het die manne nie met die vroue in die publiek gepraat nie.  Dit was teen die wet.  Jy het selfs nie met jou eie vrou of sister of dogter in die openbaar gepraat nie.  Daar was wel voorsiening dat jy met jou ma kan praat.

Tweedens het ‘n Rabi of godsdienstige leier nie met ‘n prostituut gepraat nie.  Nog meer het hulle nooit met vroue gepraat nie, die rabi’s en godsdienstige leiers.  Daar was selfs ‘n groep fariseërs wat nie eers na ‘n vrou gekyk het nie.  Hulle het hulle net toegemaak en aangehou loop.

Derdens het Jode en Samaritane eenvoudig net nie met mekaar gepraat nie.  Hulle het mekaar gehaat. 

Joh 4:9 En die Samaritaanse vrou sê vir Hom: Hoe is dit dat U wat ‘n Jood is, van my vra om te drink terwyl ek ‘n Samaritaanse vrou is? Want die Jode hou geen gemeenskap met die Samaritane nie.

Nou hoe het sy dan geweet dat Hy ‘n Jood is?  Hy moes soos ‘n Jood gelyk het.  Sy moes dit ook in Sy klere gesien het wat Hy aan gehad het.  Die klere wat ‘n Rabi gedra het.  So sy het geweet.  Maar sy kon dit nie glo nie.  Die Jode het dan geen gemeenskap met die Samaritane gehad nie.  Daar was rasse-haat.  Bitterheid oor die ontrouheid.

Sy was geskok waarom ‘n Jood uit haar eie drink emmer sou drink.  En dit is Jesus.  Hy vebreek elke grens.  Sy liefde verbreek grense.  Sy liefde ryk uit na mense wat nie eers na Hom soek nie.  Mense wat dit nie verwag nie.

Joh 4:10 Jesus antwoord en sê vir haar: As jy die gawe van God geken het en geweet het wie Hy is wat vir jou sê: Gee vir My water om te drink, sou jy Hom gevra het en Hy sou vir jou lewende water gegee het.

As jy die gawe van God geken het.  Wat is die gawe van God? Joh 3:16 “Want so lief het God die wêreld gehad dat Hy Sy eniggebore Seun gegee het...”  As jy dit geweet het sou jy My gevra het vir die lewende water.

Jesus draai dit om.  Hy is dors en sy het die bron om vir Hom water te gee.  Nou het sy dors en Jesus is die bron.  Jesus begin by die fisiese dors en draai dit om na ‘n geestelike behoefte en sê, Ek het dit wat jy die nodigste het.  Dit is bedekte stelling, soortgelyk aan die een wat hy gemaak het aan Nikodemus, “Jy moet weer gebore word.”

In die Ou Testament kry ons ‘n belofte van die lewende water.

Jes 55:1 o Almal wat dors het, kom na die waters; en wie geen geld het nie, kom, koop en eet; ja, kom, koop sonder geld en sonder prys, wyn en melk!

Jesus praat nie van die fountain of youth nie.  ‘n Geheime fontein nie.  Maar sy het waarskynlik gedink Jesus weet van ‘n spruit waarvan sy nog nie weet nie.

Joh 4:11 Die vrou sê vir Hom: Here, U het nie eens ‘n skepding nie, en die put is diep; waarvandaan kry U dan die lewende water?

12 U is tog nie groter as ons vader Jakob nie, wat die put aan ons gegee het en self daaruit gedrink het, en sy seuns en sy vee?

So vra sy vir Hom, as jy ‘n geheim het om hierdie lewende water te kry, dan moet jy iets kan doen wat selfs Jakob nie kon doen nie of nie geweet het van nie.  Jy is tog nie groter as Jakob nie?  Sy is steeds verward.

Joh 4:13 Jesus antwoord en sê vir haar: Elkeen wat van hierdie water drink, sal weer dors kry;

14 maar elkeen wat drink van die water wat Ek hom sal gee, sal in ewigheid nooit dors kry nie, maar die water wat Ek hom sal gee, sal in hom word ‘n fontein van water wat opspring tot in die ewige lewe.

En haar reaksie hierop sê, nou weet sy, iets is anders.  Maar sy is nog nie 100% seker nie.  Jesus sê vir haar, wat hierdie fisiese water vir jou droë mond kan doen, so sal My water vir jou droë siel kan doen.

Elke mens dors, elke mens soek water.  Hoeveel te meer het die mens nie die lewende water nodig nie.  En ek is seker dat haar reaksie was positief alhoewel sy nie heeltemaal alles verstaan het of die implikasies besef het nie.

Joh 4:15 Die vrou sê vir Hom: Here, gee my daardie water, sodat ek nie dors kry en hier hoef te kom skep nie.

En Jesus kon gesê het “goed, hier is dit”, maar is dit wat Hy doen?  Nee!  Hoekom nie?  Anders was dit ‘n goedkoop bekering, en hoeveel van hulle is daar nie?  Wat bedoel ek?  Hoeveel mense sou nie graag reageer as jy vir hulle ‘n oorvloedige lewe belowe nie?  Baie.  Baie mense soek oorwinning en as jy dit aan hulle belowe en ‘n uitnodiging maak, gaan hulle kom.

Maar Jesus werk nie so nie.  Wat doen Jesus toe die vrou sê, gee my daardie water?  Wat doen Jesus?  Hy spreek ‘n belangrike ding aan en dit is sonde!  Sy moet eers besef dat Sy ‘n sondaar is en Sy moet besef wie Christus is.  Net ‘n behoefte om die ewige lewe te hê, of om oorwinning te hê, of om jou ewige dors te les is nie genoeg nie.

‘n Behoefte na die ewige lewe is nie genoeg nie.  Daar moet ‘n besef van sonde wees en ‘n daadwerklike bekering van sonde, ‘n wegdraai van sonde en ‘n draai na Jesus Christus toe.  En hierdie  vrou het nog nie daar uitgekom nie.

Sy het nog nie geweet wie Jesus is nie.  Sy het nog nie besef dat sy ‘n sondaar is verlore sonder God nie.

Daar is te veel goedkoop bekerings in die kerk.  Mense wat ‘n behoefte het na ‘n beter lewe, wat graag hemel toe wil gaan, maar hulle besef nog nie dat daar iets tussen hulle en God staan nie, en dit is sonde.  En dit is wat Jesus doen.  Hy maak haar bewus van haar sonde, as jy verder lees wat gebeur.

Jesus het gekom om te soek en te red die wat verlore is.

Die hart van die evangelie

 

2 Kor 5:20 Ons tree dan op as gesante om Christus wil, asof God deur ons vermaan. Ons bid julle om Christus wil: Laat julle met God versoen.

21 Want Hy het Hom wat geen sonde geken het nie, sonde vir ons gemaak, sodat ons kan word geregtigheid van God in Hom.

Die hart van die evangelie gaan oor een ding en dit is verlossing, en die inhoud van verlossing is die plaasvervangende offer van Christus. 

Predikers wat ‘n verlossing preek, sonder die bloedoffer, mis die hart en die inhoud van die hemelse boodskap.  Solank as wat ek op die kansel staan en die Woord van God preek, sal ek en kan ek nie anders as om oor en oor hierdie elementêre waarhede aan julle te verkondig nie.  Ek sal en ek kan nooit die boodskap van saligheid verander nie.

Dit is belangrik dat ons ook ander waarhede sal preek, maar ons kan nie die basiese beginsels vergeet of nalaat nie. Dit is die fondasie van ons geloof.  Ons geloof is daarop gebou.  Ons moet ons harte bewaar en hierdie waarheid, die eerste beginsels van die geloof, verdedig met alles wat in ons is. 

Daar is kerke wat vandag nie meer die eerste beginsels van die geloof preek en verdedig nie, hulle hou hulleself besig met allerhande menslike wyshede en pragtige motiverings boodskappe.

Nee, kom ons hou vas aan die eerste beginsels, kom ons staan op die waarhede van die Woord wat lewe gee, kom ons verklaar die fundamentele waarhede van die evangelie van Jesus Christus. 

Ek het geen begeerte om populêr te wees met enige ander boodskap nie.  Die mense moet maar van my sê, hy preek maar daardie ou ou storie van Jesus se liefde.  Dit sal altyd die inhoud wees van my boodskap:

Op 1:5 “…Aan Hom wat ons liefgehad het en ons van ons sondes gewas het in sy bloed.”

Dit is die boodskap wat ek wil verkondig, dat daar ‘n God in die hemel is wat ons so liefgehad het, terwyl ons nog ‘n sondaar was en dat Hy ons sondes met Sy bloed wegwas, wanneer ons ons tot Hom bekeer.

1.    2 Kor 5:21

2 Kor 5:21 Want Hy het Hom wat geen sonde geken het nie, sonde vir ons gemaak, sodat ons kan word geregtigheid van God in Hom.

Hier leer ons van die plaasvervangende dood van Jesus Christus.  Dit is hierdie waarheid waarvan mense van bewus moet wees.  Luister!  Daar is niks wat die mens se hart so kan aanraak soos die kruisdood van Christus nie. 

En wanneer die hart aangeraak en gewond is met die twee snydedende swaard van die wet, kan niks anders daardie wonde genees soos die salf wat vloei van Jesus se deurboorde hart nie.  Die kruis is lewe vir die wat geestelik dood is.

Daar bestaan nie so iets dat ‘n mens vir God kan leef en heilig kan lewe, sonder hierdie lering van die dood van Christus in die plek van die mens nie.

Die Heilige Gees moet eers die hart van klip, waarin daar geen hartklop is nie, verwyder en ‘n hart van vlees gee, dan kan die mens hierdie waarheid ken.  Hulle wat oppad is na ‘n ewigheid sonder God, wat verlore is, wat vasgevang is in die greep van sonde. 

Dis selfs op hulle waarop God hierdie lig wil laat skyn. Die ou ou storie van die groot Liefling van die mens se siel wat Homself gegee het vir hulle verlossing.  Dit is hierdie storie wat steeds vandag die grootste krag is tot redding vir die wat glo.

Geen ander storie, geen ander evangelie, geen ander boodskap wat die mens kan aangryp, soos die evangelie van Jesus Christus nie.

Hierdie is die belangrikste waarheid, en dit is dat God die mens sien in sy verlore toestand agv sy sonde, dat God die sonde van die mens neem en dit op sy enige gebore Seun plaas, wat Hom sonde vir ons gemaak het, al het Hy geen sonde geken nie, en nou kan hy wat in Jesus Christus glo, geregtigheid van God in Christus word.  Christus word sonde gemaak, sodat sondaars geregverdig kan word.

Die verse wat ons gelees het sê: “…Hom wat geen sonde geken het nie.”

Ons plaasvervanger was onbesmet, onskuldig, en rein.  Hy het geen sonde geken nie.  Jesus Christus, die Seun van God, het vlees geword en onder ons kom woon; en alhoewel hy vlees geword het, het hy nie sonde geken nie. 

Op Hom was sonde geplaas, nie dat Hy skuldig was of daardeur skuldig geword het nie.  Hy was nie, en kon nie, ‘n sondaar wees nie.  Hy het geen persoonlike kennis van sonde gehad nie.

Deur sy hele lewe het Hy nooit die wet oortree nie.  Die wet was in sy hart, dit was in Sy natuur om heilig te wees.  Hy kon sê:

Joh 8:46 “Wie van julle oortuig My van sonde?…”

Selfs ‘n aardse regter, Pilatus, het gesê:

Mark 15:14 “…Watter kwaad het Hy dan gedoen? Hulle skreeu toe nog harder: Kruisig Hom!”

Daar was nie een getuie in Jerusalem wat teen Hom kon getuig nie.  Soos die Jode die paaslam ondersoek het, voordat hulle dit geslag het, so het die skrifgeleerdes, die Fariseërs en die wetgeleerdes, die heersers en prinse, Jesus ondersoek, en geen fout in Hom gevind nie.  Hy was die Lam van God, sonder vlek of rimpel.

Ons verse sê verder “…Hy het Hom…sonde…gemaak…”

Maar Hy het op Homself die gelykheid van die sondige vlees geneem.  Dit sou vir ‘n sondige mens nie soveel moeite gewees het om saam met ander sondige mense te lewe nie, maar dit sou ‘n groot smart wees vir die een wat rein van hart is om in die gemeenskap van losbandiges te wandel. 

Watter smart was dit nie vir die rein en volmaakte Christus wat saam met die roekeloses, die selfsugtiges, en die onheiliges moes bly nie.  Hoeveel meer nog dat Hy die sonde van daardie skuldige mense op homself moes neem.  Geen mens sal dit ooit kan begryp nie.

Die Bybel sê Hy is sonde gemaak.  God het die gewig van sonde op Jesus, wat Homself vrywilliglik beskikbaar gestel het, geplaas.  Jesus het dit gedoen, sodat ons wat skuldig was, geregverdig kan word, terwyl Hy wat geen sonde geken het nie, behandel was as die skuldige een.

Die natuurlike mens kan hierdie waarheid nie begryp nie, want dit is die werk van God.  Dit is die grootste wonderwerk.  En wonderwerke kan alleenlik deur geloof aanvaar word as wat ‘n mens dit wil probeer uitwerk.

Christus was nie skuldig nie, en kon nie skuldig gemaak word nie, maar word behandel asof Hy skuldig was.  Hy was nie net as ‘n sondaar behandel nie, maar was behandel asof Hy sonde self is.

Hy het die gewig daarvan gevoel in die tuin van Getsemane, dat Hy bloed gesweet het.  Hy het die volle gewig daarvan gedra op die kruis.  Daar in sy donkerste ure het Hy meer gedra as wat ons ooit sal kan besef.

Jes 53:12 “…omdat Hy sy siel uitgestort het in die dood en saam met die oortreders getel was…”

‘n Mens kan nie eers probeer om te beskryf wat Hy alles deurgemaak het vir ons nie.  Die kruis van Golgota spreek van die wraak wat God geneem het teen sonde.  Dit was die plek waar God sy strafstok laat val het op die sonde van die wêreld.  Dit is op die kruis waar God afgereken het met die sonde van die wêreld.  Dit is hier waar ons God se haat vir sonde sien.

Die vraag is: wie het dit gedoen?  Ons skrifgedeelte sê: Hy het Hom…sonde vir ons gemaak.  Dit was God self wat Sy Seun gekies het en Hom sonde gemaak te het vir die skuld van die wêreld.  Hierdeur bewys God Sy goddelike soewereiniteit, deur die feit dat Hy gedoen het wat geen iemand anders kon doen nie. 

Dit sou nie moontlik wees vir almal van ons om sonde op Jesus se skouers te lê nie.  Maar dit was moontlik vir die groot Regter, wat in sy alwysheid besluit het dat dit so moes wees.

Die dood van Jesus openbaar goddelike geregtigheid.  Dit was hoe God dit wou hê, en dit is hoe Hy sy liefde bewys, deur wraak te neem teen sonde.  Watter tipe regter in Suid-Afrika deel straf uit aan misdadigers en moordenaars?  ‘n Baie goeie regter.  ‘n Regter wat nie misdadigers laat boet vir dit wat hulle gedoen het nie, doen onreg aan die res van die mensdom.

As ‘n goeie regter, reg laat geskied teen misdadigers, hoeveel te meer sal God wat ‘n goeie God is, en ‘n Goeie Regter is, nie reg laat geskied nie.  As daar moordenaars, verkragters, diewe, rowers, in hemel was, sou die hemel nie hemel gewees het nie.

God doen nie ongeregtigheid om Sy genade te betoon nie.  God spaar nie die skuldiges om so sy goedertierenheid te bewys nie.  Elke oortreding en ongehoorsaamheid dra straf.  Maar deur die offer van Christus is die straf gedra.  Die volkome prys van sonde is betaal deur die versoening wat gemaak is, om so aan die eise wat die wet gestel het, te voldoen.

So sien ons die genade van God deur die plaasvervangende offer.  Hierdie saligheid was die werk van God self, en geen mens het of kon enige bydrae gemaak nie.

En omdat God hierdie versoening bewerk, kon niemand dit beter gedoen het nie.  Net soos God aan Abraham ‘n offer voorsien het op die plek wat Abraham genoem het, Jahwe Jireh, die Here het voorsien, so het God ‘n offer voorsien vir jou en vir my om in ons plek te sterf.

Luister! As God te vrede is met die offer van Sy Seun Jesus, hoeveel te meer moet ons nie te vrede wees nie?  Sal ons, onsself nie in Hom verlustig, deurdat Hy ons met so ‘n offer red nie.  ‘n Offer wat Hy self gekies het, wat Hy self voorsien het, en wat Hy aanvaar.  “Hy het Hom wat geen sonde geken het nie, sonde vir ons gemaak.”HyHy

 Die vers sê ook: “sodat ons kan word geregtigheid van God in Hom.”

Elke mens wat in Jesus glo, word geregtigheid van God in Hom.  Ons word geregverdig deur geloof in Christus Jesus.

Rom 5:1 Omdat ons dan uit die geloof geregverdig is, het ons vrede by God deur onse Here Jesus Christus;

Ons word nie net gemaak om die karakter van “regverdiging” te hê nie, maar ons word die inhoud van geregtigheid.  Ek dink nie ons kan dit regtig begryp wat dit beteken om geregtigheid te word nie, maar dit is beslis nie ‘n netelige saak nie.  Dan sê dit verder dat ons nie net geregtigheid word nie, maar ons word die geregtigheid van God.  Hierin lê ‘n groot verborgenheid.

Die geregtigheid wat Adam gehad het in die tuin van Eden was perfek, maar dit was die geregtigheid van ‘n mens.  Ons is die geregtigheid van God.  Die geregtigheid van ‘n mens het misluk.  Maar die gelowige het ‘n goddelike geregtigheid wat nooit kan misluk nie.  Die gelowige het nie net geregtigheid nie, maar hy is geregtigheid. 

Ons vers sê: “sodat ons kan word geregtigheid van God in Hom.”

Hoe aanvaarbaar moet die mens nie vir God wees, wat deur Hom die geregtigheid van God gemaak is nie?  Hoeveel meer aanvaarbaar kan jy wees as dit?

Kom ons som dit alles op:

Christus word sonde gemaak, alhoewel hy nie sonde geken het nie.  Ons word geregtigheid gemaak, alhoewel ons nie in onsself en deur onsself geregverdig is nie. 

Kan u dit raaksien vanaand!  As jy nog nie wedergebore is nie, wil jy nie vandag die groot Plaasvervanger wat God voorsien het in Sy Seun Jesus Christus aanvaar nie, dan sal jy sien hoe jou sondes weggewas word en geregtigheid jou deel word.

Jou sonde was op Jesus geplaas, hulle is nie meer daar nie, want Hy het dit begrawe.  Daar is reeds voorsiening gemaak vir jou in Hom.  Maar jy word alleen geregverdig in Hom. 

Daar is nie beter goeie nuus as dit wat ek jou nou vertel nie.  Daardie swaar gewig van sonde wat op jou skouers is en die vloek van daardie las wat jy dra.  Dit kan weggeneem word, as jy die Here Jesus Christus bely en in jou hart glo.

2. (eerste gedeelte van ons teksgedeelte) 2 Kor 5:20

2 Kor 5:20 Ons tree dan op as gesante (ambassedeers/ verteenwoordigers) om Christus wil, asof God deur ons vermaan. Ons bid julle om Christus wil: Laat julle met God versoen.

(CEV)

2 Cor 5:20 We were sent to speak for Christ, and God is begging you to listen to our message…”

Aan God se kant is daar ‘n welwillendheid om te versoen.  Hy het ‘n weg gemaak waardeur jy kan kom.  Dit het Hom duur gekos, maar vir jou is dit vernuut.  God kon nie sy oordeel opgee, want daardeur sou Hy Sy eie eer vernietig nie, maar Hy het Sy Seun opgegee.  Sien hoe graag wil God jou ontmoet.  Sien hoe gewillig is Hy.

Ons bid julle om Christus wil: “…laat julle met God versoen.”

Hoekom sou jy nie vrede met God wou hê, terwyl Hy graag met jou wil versoen nie?  God sal geen mens wegwys wat na Hom toe gaan en met Hom wil versoen nie.

God het alles gedoen, sodat jy met Hom kan versoen.  Hoekom sou jy nie met Hom wou versoen nie?

Die persoon wat nie die Here wil dien nie; hoe kan hy so min dink van die dood van God se Seun?  Dit is die grootste wonder in die ewigheid.  Hoekom sou iemand die ewige lewe nie wou aanvaar nie?  Hoekom sou enigiemand die ewige dood kies?  Hoekom sou enigiemand die Een wou verwerp wat vir jou lewe kan gee? 

Mat 11:28 Kom na My toe, almal wat vermoeid en belas is, en Ek sal julle rus gee.

29 Neem my juk op julle en leer van My, want Ek is sagmoedig en nederig van hart, en julle sal rus vind vir julle siele;

30 want my juk is sag en my las is lig.

Die Here sê vandag: Kom na My toe.

Joh 7:37 En op die laaste dag, die groot dag van die fees, het Jesus gestaan en uitgeroep en gesê: As iemand dors het, laat hom na My toe kom en drink!

Wil jy nie reageer op die roepstem van die Here nie?  Hoor die woorde van God: “Laat julle met God versoen.”

Die kroning van die Koning

Sag 6:9 En die woord van die HERE het tot my gekom en gesê:

10 Neem aan van die ballinge, uit die hand van Heldai, Tobía en Jedája—kom jy op dieselfde dag en gaan na die huis van Josía, die seun van Sefánja, waar hulle uit Babel aangekom het—

11 neem dan aan silwer en goud, en maak ‘n kroon en sit dit op die hoof van Josua, die seun van Jósadak, die hoëpriester,

12 en sê vir hom dit: So spreek die HERE van die leërskare: Kyk, daar kom ‘n Man wie se Naam is Spruit, en Hy sal uit sy plek uitspruit, en Hy sal die tempel van die HERE bou.

13 Ja, Hy sal die tempel van die HERE bou, en Hy sal majesteit verkry en sit en heers op sy troon; ook sal Hy ‘n priester wees op sy troon, en die raad van vrede sal tussen hulle twee bestaan.

14 En die kroon moet as gedagtenis bly aan Helem en Tobía en Jedája, en aan die vriendelikheid van die seun van Sefánja in die tempel van die HERE.

15 En die wat ver is, sal kom en aan die tempel van die HERE bou. Dan sal julle weet dat die HERE van die leërskare my na julle gestuur het. En dit sal so wees, as julle nougeset luister na die stem van die HERE julle God.

Ons het twee weke gelede gekyk na die vestiging van God se koninkryk op aarde en die visioen wat Sagaria gesien het, hier in hoofstuk 6.  Ons sien dat God eers gaan afreken met sonde, sondaars en die bose wêreldse sisteem.  Wanneer Jesus kom gaan God se oordeel begin in die Kidron vallei, oos van Jerusalem en dit gaan versprei oor die hele aarde.

Wanneer dan met sonde afgereken is, sal God se Gees tot ruste kom.  En voordat dit nie alles gebeur nie kan Israel nie in die koninkryk inkom nie.  Ons kom dan by die tweede punt van die vestiging van Christus se koninkryk op aarde.

2. Die kroning van die Koning

V9 is nie ‘n visie nie, maar eerder ‘n Woord van die Here, na al die visioene wat Sagaria gehad het.  Die visioene is verby en nadat Sagaria al die visioene oor die toekoms gesien het, kry hy ‘n woord van die Here wat daardie volgende dag gebeur het, soos ons kan sien in die geskiedenis.  Maar hierdie gebeurtenis is in ‘n sekere sin simbolies vir die kroning van die Here Jesus Christsus in die toekoms.

En hierdie is sekerlik een van die ongelooflikste gedeeltes in die Bybel wat gaan oor die verhoging van Jesus Christus as Koning.  Dit is die klimaks van die mens se geskiedenis.  Dit gaan nie soseer oor ‘n gebeurtenis nie, maar oor ‘n persoon.

Vir die Jode is die hoogste klimaks van die geskiedenis, die koms van die Messias, ‘n persoon.

Sag 6:9 En die woord van die HERE het tot my gekom en gesê:

So hier is nie ‘n visioen nie, hierdie is die Woord van die Here.  Hy sien nie iets nie, hy hoor die Woord van die Here.

Sag 6:10 Neem aan van die ballinge, uit die hand van Heldai, Tobía en Jedája—kom jy op dieselfde dag en gaan na die huis van Josía, die seun van Sefánja, waar hulle uit Babel aangekom het—

So wat gebeur hier?  Al was daar baie mense reeds terug in Palistina en baie wat terug gekom het van Babilon af waar hulle gevange was, was daar nog steeds ander daar.  En so nou en dan het ‘n klomp Jode terug gekom van Babilon af na Israel toe.

En op hierdie spesifieke dag het ‘n klomp Jode terug gekom.  Hulle baie jare later terug gekom van Babilon af, na die ander Jode.  En hierdie groep wat nou terug kom was ‘n interresante groep.  Daar was ‘n paar interresante ouens.  Heldai, Tobia, Jedaja e Josia.

Hierdie ouens kom van Babel af, maar hulle kom nie met leë hande nie.  Hulle kom met goud en silwer, maar die rede hoekom hulle kom met goud en silwer is omdat hulle wil bydra tot die opbou van die tempel. 

Kyk wat beteken hierdie ouens se name: Heldai beteken “die Here se wêreld”, Tobia beteken “God is goed”, Jedaja beteken “God weet”, en Josia beteken “die Here ondersteun”.  So hulle name spreek van God se karakter.

So net na die visioen, op dieselfde dag kom daar ‘n groep Jode van Babel af met goddelike voorsiening.  En Sagaria word gevra om hulle te gaan ontmoet.  En dan lees ons in v11,

Sag 6:11 neem dan aan silwer en goud, en maak ‘n kroon en sit dit op die hoof van Josua, die seun van Jósadak, die hoëpriester,

Maw hulle bring goud en silwer vir die tempel, maar hulle vat dit en maak ‘n kroon.  Ons vertaling sê “’n kroon”.  Maar in die Hebreeus is dit in die meervoudsvorm.  Hulle moet krone, meervoud maak.  Die KJV is reg vertaal.

Zec 6:11 Then take silver and gold, and make crowns...

Maar die bedoeling is nie hier dat hulle ‘n klomp krone gemaak moet word nie.  Dit verwys eerder na ‘n saamgestelde kroon.  ‘n Kroon wat saamgestel is uit goud en silwer.  Die kroon word dan op die hoof van Joshua gesit, die seun van Josadak, die hoëpriester.

Nou dit is baie vreemd in die Ou Testament, want die priesterlike amp en die koninklike amp was altyd van mekaar geskei.  Jy kon nooit priester en koning wees nie.  In 2 Kron 26 sien ons waar die Koning Ussía die rol van ‘n priester wou opneem.  En kyk hoe het God gereageer.  Die Here het hom aangetas met melaatsheid.  En hy is oorlede.

‘n Koning was nie ‘n priester nie en ‘n priester was nie ‘n koning nie.  Hoekom sou hulle dan ‘n kroon op die hoëpriester Josua se hoof sit?  Want dit is net ‘n beeld.  Dit is ‘n beeld van Jesus Christus.  Daar is net Een priester wat ‘n koning kan wees, dit is Jesus Christus.  Christus is die Koning Priester. 

So Sagaria kry ‘n Woord van die Here en dit simboliseer die kroning van die Hoëpriester, naamlik Jesus Christus.

Sag 6:12 en sê vir hom dit: So spreek die HERE van die leërskare: Kyk, daar kom ‘n Man wie se Naam is Spruit, en Hy sal uit sy plek uitspruit, en Hy sal die tempel van die HERE bou.

Daar kom ‘n Man wie se Naam is Spruit... Na wie verwys dit?

Joh 19:5 En Jesus het uitgekom buitentoe en die doringkroon en die purperkleed gedra. En Pilatus sê vir hulle: Dáár is die mens (man)!

Pilatus het dit nie geweet, maar hier weerklink hy die woorde van Sagaria. “Behold the Man” (KJV).  Die Messias, die finale Koning Priester was ‘n mens.  As die Jode nie so blind was nie, sou hulle die profesieë van Sagaria onthou het.  Weereens dra Hy ‘n kroon.  Hy is God wat mens geword het.

Dan sê Sagaria, “’n Man wie se Naam is Spruit...” Die KJV sê, “behold the man whose name is The BRANCH;”  En dit is die titel wat in die Ou Testament op baie ander plekke gegee word vir die Messias.

Let op!  Dit gaan hier oor die verhoging en kroning van ons Verlosser en Saligmaker, Jesus Christus.  En hier word ‘n paar dinge oor Hom gesê:

Sag 6:12 ...(1) en Hy sal uit sy plek uitspruit, en Hy sal die tempel van die HERE bou.

Dit weergalm die woorde van Jes 53:2

Jes 53:2 Hy tog het soos ‘n loot voor sy aangesig opgespruit en soos ‘n wortel uit droë grond...

Wat beteken dit?  Dit beteken dat Hy uit Sy eie mense en Sy eie land sal opgroei.  En toe Hy 12 jaar oud was het hulle gesê, “Hy het toegeneem in wysheid en in grootte en in genade by God en die mense.”  Hy het as ‘n mens opgegroei onder mense, maar Hy was ook God.  Hy was een van die volk Israel.

Sag 6:12 ...en Hy sal uit sy plek uitspruit, en (2) Hy sal die tempel van die HERE bou.

Julle weet wat gebeur met Jesus se eerste koms.  Hy het die tempel gereinig en net daarna weggegaan.  God het in 70 nC gekom en die tempel vernietig.  Maar daar kom weer ‘n dag in die toekoms wanneer die God die Messias gaan stuur om weer die tempel te herbou.

In Eseg 40-42 kry ons ‘n beskrywing van hierdie tempel wat Hy gaan opbou tydens Sy Koninkryk op aarde.  Hy gaan ook nie die hulp van mense nodig hê nie.  Hy self sal dit opbou.  Die Koninkryk sal ‘n tyd wees waar die hele wêreld Hom sal aanbid of hulle sal onmiddelik geoordeel word.  Hy sal met ‘n ysterstaf regeer.

Sag 6:13 Ja, Hy sal die tempel van die HERE bou, en (3) Hy sal majesteit verkry en sit en heers op sy troon; ook sal Hy ‘n priester wees op sy troon, en die raad van vrede sal tussen hulle twee bestaan.

Vers 13 herhaal dit weer, en dan derdens, “Hy sal majesteit verkry”, “he shall bear the glory.”  Wat ‘n ongelooflike verklaring.  Hy sal geklee wees met heerlikheid en eer.  Hy sal ontvang wat Hom toekom.  Hy sal die majesteit verkry.

Jes 42:8 Ek is die HERE, dit is my Naam; en my eer sal Ek aan geen ander gee, of ook my lof aan die gesnede beelde nie.

In daardie dag sal alles Syne wees en ons sal deel wees van die kore wat sing van Sy lof en eer.  Die Een wat verneder was sal gekroon word.

Sag 6:13 Ja, Hy sal die tempel van die HERE bou, en Hy sal majesteit verkry en sit en (4) heers op sy troon; ook sal Hy ‘n priester wees op sy troon, en die raad van vrede sal tussen hulle twee bestaan.

Hy heers as Koning en sal Priester wees op Sy troon.  Koning en priester het eenvoudig nie gemeng nie.  Daar is geen manier dat een persoon beide kon wees nie.  Maar nie met Christus nie.  Wanneer Hy kom, gaan Hy Koning en Priester wees.

Psa 110:4 Die HERE het gesweer, en dit sal Hom nie berou nie: U is priester vir ewig volgens die orde van Melgisédek.

En watse soort priester was Malgisedek?  As jy terug gaan Genesis toe, dan lees jy van hom.  Hy was ‘n priester wat ook ‘n koning was.  So sal die Messias ook wees.  Hy regeer nie net as Koning nie, maar Hy tree vir ons ook in as Priester.

Sag 6:13 Ja, Hy sal die tempel van die HERE bou, en Hy sal majesteit verkry en sit en heers op sy troon; ook sal Hy ‘n priester wees op sy troon, en (5) die raad van vrede sal tussen hulle twee bestaan.

Maw Hy sal vrede maak tussen die twee, tussen die amp van die koning en die amp van die priester.  Wat sal dit dan beteken?  Julle weet in die wêreld vandag is daar ‘n duidelike skeiding tussen die kerk en die staat.  Maar nie in Jesus Christus se koninkryk nie.  Hy sal die twee harmoniseer.  Hy sal die twee in een bring.

Selfs in Israel se geskiedenis sien ons hoe die konings sleg was en korrup.  Aan die ander kant was die priesters en die profete wat na God toe uitgeroep het.  Hoeveel keer in die wêreld was daar nie ‘n verskriklike teenstelling tussen godsdiens en politiek nie?  Kerk en politiek gaan eenvoudig nie saam nie. 

Maar net in Jesus se Koninkryk.  Want dieselfde Een wat regeer is dieselfde Een wat intree en wat die aanbidding van God die maatstaf maak vir elke mens.  Daar sal geen verdeeldheid wees nie en geen onenigheid nie.

Sag 6:15 (6) En die wat ver is, sal kom en aan die tempel van die HERE bou...

Wie is hulle wat ver is?  Vir die Jode is hulle wat ver was die heidene.  Jy kry dieselfde frase in Efesiërs, ook in Romeine.  Hulle wat ver was het naby gekom.  Hulle is die heidene.  En hulle sal kom en aan die tempel van die Here bou.  Let op!  Hulle sal aan die tempel bou.  Hulle sal nie DIE tempel bou nie, maar aan die tempel bou.  Die Heilige Gees vergeet nie om ‘n voorsetsel in te sit nie.

Christus gaan Sy tempel bou en die wat ver is gaan aan die tempel bou.  Hulle gaan ‘n bydrae maak aan die tempel.  Daar gaan mense wees wat nie deel was van die volk nie wat God se volk sal word in die koninkryk.

Jes 2:2 En aan die einde van die dae sal die berg van die huis van die HERE vasstaan op die top van die berge en verhewe wees bo die heuwels, en al die nasies sal daarheen toestroom.

Al die nasies sal daarheen stroom.

Jes 2:3 En baie volke sal heengaan en sê: Kom laat ons optrek na die berg van die HERE, na die huis van die God van Jakob, dat Hy ons sy weë kan leer en ons in sy paaie kan wandel. Want uit Sion sal die wet uitgaan en die woord van die HERE uit Jerusalem.

Al die nasies in die koninkryk sal die ware en enigste God aanbid.  Christus sal deur al die nasies aanbid word oor die hele wêreld.  Ons kry dieselfde verklaring in Miga 4:1&2.  Die heidene sal kom en God aanbid.

Sag 6:15 En die wat ver is, sal kom en aan die tempel van die HERE bou. Dan sal julle weet dat die HERE van die leërskare my na julle gestuur het...

Wanneer Jesus kom en Sy koninkryk op aarde gaan oprig, gaan mense nie onseker wees en vrae vra of hierdie profesie 100% akkuraat is nie.  Daar is baie mense vandag wat nie glo dat Jesus letterlik gaan terug kom nie.  Baie glo nie in ‘n fisiese letterlike koninkryk op aarde nie.

Maar Sagaria sê, dat wanneer hierdie dag aanbreek sal almal weet dit het aangebreek.  Julle sal weet dat die Here van die leërskare my na julle gestuur het.  Die bevestiging van hierdie profesie is Jesus Christus self wat kom.  Hy is die bevestiging van God se waarheid.

Sag 6:15 ...En dit sal so wees, as julle nougeset luister na die stem van die HERE julle God.

Beteken dit dat die koninkryk van die Here is van ons afhanklik nie?  Nee.  Dit beteken dat hulle deelname in die koninkryk hang van hulle af.  Die vervulling van die koninkryk sal plaasvind, want God het dit so beplan.  Maar of jy daarvan gaan deel wees of nie hang af of jy na Sy stem gaan luister of nie.

Dit is waar dat die koninkryk nie gaan kom nie voordat God geoordeel het en Israel gered het nie.  Maar dit is God se plan wat Hy gaan uitvoer.  En dit sal so wees vir jou as jy nougeset wandel en luister na die stem van die Here.  Nie almal gaan nie. 

Wanneer Christus gaan kom, sal die hele Israel gered word, maar dit beteken nie dat elke Jood gered sal word nie.  Dit beteken net Israel as nasie in die algemeen sal gered word.  Hoekom?  Want Eseg 20:28 sê dat selfs dan sal daar Jode wees wat sal rebelleer en God sal hulle verwyder.

Jy sien die koninkryk sal kom en God sal dit in laat plaasvind, maar net die gehoorsame wat luister na Sy stem sal daaraan deelhê en dit geniet.

Slot

Wat leer ons oor Christus?  Hy groei op, spruit op uit Israel, Hy kom om Sy duisendjarige tempel te bou, Hy sal met heerlikheid beklee wees, Hy sal as Koning en Priester regeer, Hy sal vrede maak tussen die twee ampte, Hy maak die koninkryk beskikbaar vir al die nasies van die wêreld, Hy kom Sy Woord bevestig en laastens beveel Hy gehoorsaam aan Sy Woord.

Die Nagmaal

1 Kor 11:26 Want so dikwels as julle hierdie brood eet en hierdie beker drink, verkondig julle die dood van die Here totdat Hy kom.

In die Nuwe Testament is daar twee sakramente en dit is belangrik dat ons dit sal verstaan, omdat daarin ‘n groot seën is vir die gelowige.  Ons gaan nagmaal bedien vanoggend en daarom vir van die geleentheid gebruik maak om oor die nagmaal te gesels.

1. Wat doen ons as ons die nagmaal gebruik?

Wanneer ons die nagmaal gebruik is ons besig om te verkondig!  “Verkondig” is die Griekse woord “kataggellō”, wat beteken, “om iets te verkondig / om iets uit te beeld / om iets voor te hou”.

Maw. met die nagmaal word die dood van die Here verkondig, dit word uitgebeeld of dit word voorgehou.

Deurdat ons die dood van Christus verkondig, verklaar ons dit.  Wanneer ons om die tafel met brood en wyn saamkom, dan verklaar ons ons geloof dat Jesus, die Seun van God, mens geword het en gesterf het as ‘n offer vir ons sondes. 

Soms as daar ‘n belangrike gebeurtenis plaasvind in die geskiedenis, dan besluit mense ons moet iets doen om dit te herdenk.  Soms word ‘n klip opgerig as ‘n monument, maar dit is nie altyd so effektief nie. 

Die uittog uit Egipte was ‘n baie belangrike gebeurtenis in die geskiedenis van Israel, maar God rig nie ‘n monument op nie, Hy stel ‘n seremonie in wat op ‘n sekere dag gehou moet word.  Dit word die Pasga genoem.

Jesus het op die laaste pasga die nagmaal ingestel om sy dood te herdenk.  En nou, amper 2000 jaar na die kruisiging van Jesus, verklaar en verkondig ons steeds die dood van Jesus Christus wanneer ons die nagmaal gebruik.

Die nagmaal beteken egter nie net ons verkondig sy dood nie, maar ons beeld ook die dood van Jesus uit.  Sommige mense hang ‘n skets of prent van Jesus op sy muur, of hang ‘n kruis op om hulle aan Hom te herinner.  Maar nêrens vind ek dit in die Bybel nie.  Sulke dinge lei gewoonlik na afgodery.

Daar is selfs vertonings of dramas of wat die dood van Jesus probeer uitbeeld.  Terwyl God vir ons ‘n wyse gegee het hoe om die dood van Jesus aan onsself uit te beeld en aan ander te verkondig.  Dit is die nagmaal.  Hierdie is die Christen “vertoning”.  Hier verkondig ons die dood van Christus, God se manier.

Daar is net drie maniere in die Bybel wat God gekies het om die dood van Christus uit te beeld: deur die Woord te lees, deur die prediking van die Woord en deur die nagmaal.

Die derde betekenis van “katagello” is “om iets voor te hou” of “om bekend te maak”.  Maw ons kan nie Christenskap bekend maak of aan iemand voorhou sonder die dood en opstanding van Christus nie.  En ons kan nie na die tafel van die Here toe kom sonder om hierdie waarheid aan ander voor te hou nie.

Die oomblik wanneer ons om die tafel van die Here bymekaar kom en die brood breek en die wyn drink, mag daar niemand wees wat vra: “maar wat beteken dit alles nie.”  Ons moet die betekenis bekend maak.  Mense moet weet waarom dit gaan.

U moet weet, dat die brood gaan om Jesus se liggaam wat vir ons gebreek is en die wyn gaan om sy bloed wat vir ons gevloei het.  Hierdie tafel spreek van Jesus se dood.  Dit spreek van die gekruisigde Jesus.

Dit is hier waarop die saligheid van die mens berus.  Jesus het opgestaan en is verheerlik, wat ‘n wonderlike boodskap vir die gelowige, maar eers moet die dood van Christus aan ‘n verlore wêreld verkondig word.

Wat doen ons as ons die nagmaal gebruik? Ons verkondig dat Jesus gesterf het, hierdie waarheid word uitgebeeld in die simbole van die brood en wyn, en dan maak ons dit bekend, ons hou dit voor aan mense.

2.  Wat verkondig ons, en hoe verkondig ons dit?

Ons teksvers sê: “Want so dikwels as julle hierdie brood eet en hierdie beker drink, verkondig julle die dood van die Here totdat Hy kom.”

Wat verkondig ons?  Eerstens verkondig ons dat God Sy Seun gestuur het vir die mens.  Net soos die manna in die woetsyn gestuur is, so is Jesus in die wêreld gestuur.  Hoe verkondig ons dit?  Deur die simbole, die brood en wyn op die tafel. 

Die bedoeling waarom daar brood en wyn op die tafel geplaas is, is dat dit geëet sal word en die wyn gedrink sal word.  Die tafel wat gedek is, spreek van voorbereiding vir ‘n maaltyd of ‘n fees. 

Die nagmaal bied ‘n uitnodiging aan diegene wat honger en dors na geregtigheid.  Hy wat honger is, kom eet.  Hy wat dors het, kom drink.  Die brood en wyn op die tafel verteenwoordig Jesus.

Nou, Christus is gestuur vir die mens en dit wat vir ons voorberei is, is genoeg om die mens se geestelike honger te vul.  Die brood vervul die geestelike honger en die wyn vervul die geestelike dors.  Maw Christus vervul die geestelike nood van die mens.  Christus is genoegsaam. 

Die mens wat geestelik wil lewe moet weet, dat God het voorsiening gemaak.  Hierdie voorsiening is in Jesus Christus se kruisisging.  God skenk aan ons die brood van die lewe. 

Die brood en wyn verteenwoordig Christus as mens.  Dit verteenwoordig Sy vleeslike liggaam, en sy bloed.  Die brood en die wyn wil vir jou en my wys dat Jesus was vlees en bloed, net soos ek en jy vlees en bloed is.  Het u al gewonder waarom daar brood en wyn op die nagmaalstafel is en nie net brood of net wyn nie?

Die nagmaal verkondig sy dood.  Die brood en wyn verteenwoordig nie net dat Hy mens was nie, maar dat Hy dood was.  Die brood en die wyn is nie vermeng nie, want dan sou dit spreek van ‘n lewendige mens.  Maar die brood en wyn is apart. 

Lev 17:11 Want die siel van die vlees is in die bloed.

Die woord siel is die Hebreeuse woord “nephesh”, wat beteken, “die lewe of die asem”

Gen 2:7 En die HERE God het die mens geformeer uit die stof van die aarde en in sy neus die asem (die nephesh) van die lewe geblaas. So het dan die mens 'n lewende siel geword.

Wat gebeur as jy ophou asem haal?  Jy gaan dood.  Interesant dat die mens se bloed vervoer suurstof na al die dele van jou liggaam.  Hierdie mediese feit lees ons al reeds van in Lev 17:11.

Die lewe, die asem, die siel van die vlees is in die bloed.  Nou wat gebeur as jy al jou bloed uit jou liggaam tap?  Jy gaan dood.  Daarom spreek die brood en die wyn wat nie gemeng is nie, maar apart van mekaar is op die nagmaal tafel, van die dood van Jesus Christus.

En toe die bloed uit sy liggaam vloei, het die lewe uit sy liggaam uit gevloei.  Die liggaam is bloedloos en die wyn is ‘n teken van dood.  Die brood en wyn beeld die dood van Jesus uit.

Ons verkondig dat God Sy Seun gestuur het, dat Hy ‘n mens was.  Ons verkondig sy lyding en dood, maar deur die nagmaal te gebruik, verkondig ons ook ons deelname daarin.

Ons teksvers sê nie: “Want so dikwels as julle na hierdie brood en na hierdie beker kyk of daarna staar nie.”  Maar so dikwels as julle hierdie brood eet en hierdie beker drink.  Daar is deelname.

Christus gaan jou nie verlos, solank as wat jy na die brood van die lewe staar of daarna kyk nie.  In ‘n geestelike sin, moet jy die brood eet.   Die brood stil nie jou honger, solank as wat dit op die tafel bly lê nie.  En jou dors word nie geles, solank as wat die beker net daar staan nie.  Jy moet die brood eet en die wyn drink.

Dit is belangrik dat ons dit ook net sal verstaan!  Net soos die doop jou nie kan red nie, net so kan die nagmaal jou nie red nie.  Hierdie fisiese brood en wyn gaan jou nie red nie.  Wanneer Jesus sê in:

Joh 6:54 Hy wat my vlees eet en my bloed drink, het die ewige lewe, en Ek sal hom opwek in die laaste dag.

Dan praat Jesus nie van sy fisiese vlees en bloed nie. Nee, in die konteks van Joh 6 maak Hy die onderskeid tussen die fisiese brood, die manna uit die hemel, wat hulle vaders geëet het en tog gesterf het, en die geestelike brood, die brood van die lewe uit die hemel, wat as jy daarvan eet jy nooit sal sterwe nie.  Hierdie brood van die lewe is Jesus Christus.

En wanneer jy die brood van die lewe eet, dan beteken dit altyd in hierdie konteks, dat jy glo.

Joh 6:27 Moenie werk om die spys wat vergaan nie (maw die letterlike), maar om die spys wat bly tot in die ewige lewe (die geestelike), wat die Seun van die mens julle sal gee; want Hom het God, die Vader, verseël.

28 Toe vra hulle Hom: Wat moet ons doen om die werke van God te volbring?

29 Jesus antwoord en sê vir hulle: Dít is die werk van God, dat julle in Hom glo wat Hy gestuur het.

30 En hulle sê vir Hom: Watter teken doen U dan, sodat ons kan sien en U glo? Wat werk U?

Die skare vra: Watter teken doen U dan?

Joh 6:31 Ons vaders het die manna in die woestyn geëet, soos geskrywe is: Hy het brood uit die hemel aan hulle gegee om te eet.

32 En Jesus sê vir hulle: Voorwaar, voorwaar Ek sê vir julle, dit is nie Moses wat die brood uit die hemel aan julle gegee het nie, maar my Vader gee julle die ware brood uit die hemel.

33 Want die brood van God is Hy wat uit die hemel neerdaal en aan die wêreld die lewe gee.

Wat is die teken wat God gee, sodat hulle kan sien en glo vlg v30?  Die brood uit die hemel.  Wie het die brood gegee? V32 “…my Vader gee julle die ware brood uit die hemel.”  Wie is die brood? Jesus. V33 “…want die brood van God is Hy (Jesus) wat uit die hemel neerdaal en aan die wêreld die lewe gee.”

Joh 6:34 Toe sê hulle vir Hom: Here, gee ons altyd hierdie brood.

35 En Jesus sê vir hulle: Ek is die brood van die lewe; wie na My toe kom, sal nooit honger kry nie; en wie in My glo, sal nooit dors kry nie.

Maw. wie hierdie brood van die lewe eet sal nooit honger kry nie.  Jesus sê in der waarheid, wie in My glo sal nooit honger of dors kry nie.

Om te eet en om te glo is dieselfde ding.  Wanneer jy die brood eet, dan glo jy.  Wanneer jy glo, dan eet jy die brood van die lewe.

Ek hoef jou nie te leer om te eet as jy honger is nie.  Dit is so maklik soos om kos in jou mond te sit.  Net so is dit om in Jesus te glo.  Daar is die Verlosser.  Eet Hom.  Nie letterlik nie, maar geestelik.  So maklik is dit.  Om te glo, om in Jesus te vertrou is nie veronderstel om ‘n moeilike ding te wees nie.  Party mense probeer geloof so ingewikkeld maak, dat jy later sommer voel jy wil dit maar eerder los.

Nee!  Selfs dom mense kan eet.  Maak nie saak hoe skuldig hy is nie, hy kan eet.  Daar is geen meriete of kwalifikasie nodig om te eet nie.  As jy Hom wil hê, kan jy Hom kry.  Die daad van geloof in Christus word uitgebeeld in die brood wat jy eet.

Deur die brood te eet en die beker te drink, verklaar ons dat Jesus Christus ons Verlosser is, en met eenvoudige geloof, glo ons dat Hy ons alles is.

3. Wie moet dit verkondig?

1 Kor 11:26 Want so dikwels as julle hierdie brood eet en hierdie beker drink, verkondig julle die dood van die Here totdat Hy kom.

“julle” verwys dan na al die gelowiges van God.

Net soos met die doop, kan net gelowiges deel hê aan die nagmaal.  Net ‘n gelowige kan gedoop word.  Die doop spreek van iets wat reeds in die verlede plaasgevind het.  Die doop sê: op ‘n dag, op ‘n sekere oomblik in my lewe is die ou lewe begrawe en ek het opgestaan in ‘n nuwe lewe.  Want hulle wat in Christus is, is ‘n nuwe skepsel.  Die ou dinge het verby gegaan, alles het nuut geword.

Met die doop verkondig ek aan die wêreld, ek maak aan almal bekend dat ek gered is.

Matt 28:19 sê maak dissipels van alle nasies en doop (wie?), doop hulle.  Doop dissipels.  ‘n Sondaar wat gedoop word, is ‘n droog sondaar in die water in en ‘n nat sondaar uit die water uit.

Net so kan die nagmaal jou nie red nie, maar verkondig ons die dood van Jesus en dat Hy ons gered het.  Tweedens beeld die nagmaal ook die dood van Jesus uit in die simbole van die brood en die wyn.  En derdens word die dood van Jesus voorgehou, maw dit is ook ‘n uitnodiging aan die sondaar om tot bekering te kom en die brood van die lewe te eet, maw om in Jesus te glo.  Dan eers kan hy saam aan die nagmaalstafel sit.

Die twee sakramente in die Bybel, wys terug na die verlede, maar wys ook vorentoe na die toekoms. 

Die doop wys terug na jou bekering, maar ook vorentoe, na jou opstanding, wanneer jy jou verheerlikte liggaam gaan ontvang.

Die nagmaal wys terug na die dood van Jesus, maar ook vorentoe na die bruilofsmaal van Christus.

By die laaste pasga waar Jesus die nagmaal ingestel het, sê Hy: Ek sal nie meer saam met julle eet en drink, voordat die koninkryk van God vervul is nie.

Wanneer ons die nagmaal gebruik, dan herinner dit my nie net aan die dood aan Jesus nie, maar ook aan die feesmaal wat voorlê.  Die bruilofsmaal van die Lam.