Om soos Jesus te wees

Tema: Om soos Jesus te wees (Gal 4:19-20 & Rom 13:14)

Gal 4:19 my kinders, vir wie ek weer in barensnood is totdat Christus in julle ‘n gestalte verkry.

20 En ek sou wens om nou by julle teenwoordig te wees en my stem te verander, want ek is buite raad met julle.

Rom 13:14 Maar beklee julle met die Here Jesus Christus, en maak geen voorsorg vir die vlees om sy begeerlikhede te bevredig nie.

Ons het verlede week gekyk na Gal 4 vanaf vers 12 en ons het gesien dat Paulus probeer om die ware evangelie, die saligheid wat kom uit genade deur die geloof, te verdedig teenoor ‘n ander evangelie, wat ‘n saligheid van werke is.

Daar was Judeërs wat in die gemeentes van Galasië in gekom het en vir die mense vertel het dat hulle hul moet besny en hulle moet die wet onderhou as hulle gered wil word.  Maw volgens die Judeërs was geloof in Jesus Christus nie genoeg om jou te red nie, maar die mense moes sekere dinge doen.

Paulus smeek hulle dat hulle moet vashou aan die vryheid waarmee hulle geroep is.  Hy sê, moenie dat julle weer onder die juk van diensbaarheid gebring word nie.  Maw ons is nie onder die vloek van die wet nie, ons is vry in Christus Jesus.

Kom ek maak net hier weer ‘n belangrike opmerking: Daar is niks wat jy kan doen om God te vrede te stel of om vir God aanvaarbaar te wees nie.  Dit is wat Jesus Christus vir jou aan die kruis gedoen het wat jou aanvaarbaar maak vir God.

Godsdiens gaan jou nie red nie.  Sommige mense het ‘n gestalte van godsdiens.  Hulle het al deur al die motions gegaan.  Het die T-shirt, het die bumper sticker, doen al die regte dinge op die regte tyd.  Mense neem baie keer die gedaante van ‘n kerk aan.  Hulle leer die customs, die gewoontes van ‘n kerk aan, maar word nooit waarlik wedergebore nie.  Dit is mense wat ‘n gedaante van godsaligheid het. 

Wat is dit waarin God belangstel?  Waaroor gaan dit alles?  Wat is die doel van elke Christen? OM SOOS JESUS TE WEES.  Dat Jesus Christus in ons gestalte sal vind.

1 Joh 3:2 Geliefdes, nou is ons kinders van God, en dit is nog nie geopenbaar wat ons sal wees nie; maar ons weet dat ons, as Hy verskyn, aan Hom gelyk sal wees, omdat ons Hom sal sien soos Hy is.

Dit is ons doel as kinders van God.  Dat ons aan Hom gelyk sal wees.  Wat moet ek doen?  Dit is so eenvoudig soos dit, trek Jesus aan.  Wat is die doel van elke Christen se lewe?  Om soos Jesus te wees.

Kol 2:6 Soos julle dan Christus Jesus, die Here, aangeneem het, wandel so in Hom.

Wandel so in Hom.  “Om soos Jesus te wees”, dit is waaroor dit gaan.  Dit is wat die woord Christen beteken, iemand soos Christus.  God weet en ons weet dat meeste Christene nie soos Christus is nie, korrek?  Maar dit is ons doel, dit is waarna ons moet strewe as kinders van God.

Gal 4:19 my kinders, vir wie ek weer in barensnood is totdat Christus in julle ‘n gestalte verkry.

En julle weet wat is barensnood.  Dit is geboortepyne.  Dit is hoe Paulus voel.  Nadat hy die ware evangelie verdedig het vanuit ‘n teologiese standpunt, kom hy hier in hoofstuk 4 vanaf verse 12 en hy maak ‘n persoonlike, emosionele apél.

Hy sê, julle was bereid om julle oë uit te grawe en vir my te gee en dalk gee julle nie eers om oor al die teologie en leerstellinge wat ek genoem het nie, maar as daar net een rede is wat oor bly, dan is dit, doen dit vir my.  Doen dit vir my want ek smeek julle.  Daar was ‘n tyd wat julle lief was vir my en wat julle my geglo het.

En al wat hy kan sê is, julle het op ‘n tyd omgegee en my aanvaar.  Al wat ek vra, in hierdie pyn wat hy verkeer is, dat Christus in julle gestalte sal vind.  Nie dat julle nou van my moet hou nie.  Maar al waarin ek belangstel is dat julle die waarheid sal hoor. 

Dit is nice is julle van my hou, maar dit is nie waaroor dit gaan nie.  Dit gaan oor die waarheid.  Dit gaan oor die gestalte van Christus in julle.  Dit gaan alles daaroor, om soos Jesus te wees

Weet jy wat is baie interessant?  En ek wonder of jy al dit ooit besef het of daaraan gedink het.  Nêrens in die Bybel en selfs in die Nuwe Testament sê dit dat jy soos die Heilige Gees moet wees nie.  Het jy dit geweet? 

En wat my bekommerd maak is wanneer mense rondgaan en net praat oor die Heilige Gees en wat die Heilige Gees doen, maar hulle praat nie oor Jesus Christus nie.  Ek dink ons moet op Christus gefokus weees.  Paulus sê,

1 Kor 11:1 Wees my navolgers, soos ek dit ook van Christus is.

Kom ek gee een vers wat jou sal help.

2 Kor 3:18 En terwyl ons almal met onbedekte gesig (maw ons gesig is nie bedek nie, ons het nie ‘n sluier soos in die Ou Testament nie) soos in ‘n spieël die heerlikheid van die Here aanskou, word ons van gedaante verander na dieselfde beeld, van heerlikheid tot heerlikheid, as deur die Here wat die Gees is.

Soos wat ons die Here Jesus Christus se heerlikheid aanskou, word ons verander van gedaante na daardie selfde beeld.  Ons fokus is op Jesus Christus.  Ons word verander na Sy beeld soos wat ons na Hom kyk en op Hom fokus.

God het nie net Jesus Christus vir ons gegee, om te kom en te sterf en terug te gaan na die Vader toe nie.  God het Jesus 33 jaar op die aarde plaas sodat ons na Hom kan kyk, Hom kan sien, sien hoe Hy geleef het, sien hoe Hy opgetree het, sien hoe Hy vir ons as mens ‘n voorbeeld gestel het.

En dit is ons doel, om soos Jesus te wees, en dit gebeur wanneer ons na Hom kyk en op Hom konsentreer, dan word ons verander van heerlikheid tot heerlikheid.  Die Heilige Gees werk agter die skerms.  Die Heilige Gees verander ons, maar ons fokus nie op die Gees nie, ons fokus op Christus.

Die Heilige Gees se werk is nie om die aandag op Homself te vestig nie, maar om die aandag op Jesus Christus te vestig.  Die Heilige Gees het nie gekom om van Homself te getuig nie, maar van Jesus Christus.

Joh 15:26  Maar as die Trooster gekom het wat Ek vir julle van die Vader sal stuur, die Gees van die waarheid wat van die Vader uitgaan, sal Hy van My getuig.

Kyk wat sê die volgende gedeelte:

Joh 16:13  Maar wanneer Hy gekom het, die Gees van die waarheid, sal Hy julle in die hele waarheid lei; want Hy sal nie uit Homself spreek nie, maar alles wat Hy hoor, sal Hy spreek en die toekomstige dinge aan julle verkondig.

Jy sien!  Die Heilige Gees het nie Sy eie boodskap nie, Hy kom verkondig die waarheid van Jesus Christus.  Hy kom herinner ons aan wat Jesus geleer het.  Hy kom getuig van Jesus Christus.

Hand 1:8 maar julle sal krag ontvang wanneer die Heilige Gees oor julle kom, en julle sal my getuies wees in Jerusalem sowel as in die hele Judéa en Samaría en tot aan die uiterste van die aarde.

Julle sal MY GETUIES wees.  Dit gaan oor Jesus Christus.  Die Heilige Gees help ons om op Jesus Christus gefokus te bly.  Die vrug van die Gees is, , liefde, blydskap, vrede...ens.  Wat is dit?  Dit is om soos Jesus te wees.  Dit is die karaktereienskappe van Jesus.  Dit is ons doel, om soos Jesus te wees.

Gal 4:20 En ek sou wens om nou by julle teenwoordig te wees en my stem te verander, want ek is buite raad met julle.

Paulus sê, ek wens ek was by julle en het anders met julle gepraat.  Ek hou nie eers van hoe ek met julle praat nie.  Dit is nie lekker nie.  Maar hoe anders.  Ek is buite raad met julle.  Ek weet nie hoe anders om hoe om die saak te benader nie.

Ek is tog so bly Paulus het so gevoel.  Hy is nie die enigste een nie.  Ek voel somtyds ook so.  Daar is sommige mense wat jy oor en oor en oor antwoorde gee en jy help hulle oor en oor reg.  En dan as jy weer kyk, dan volg hulle maar weer en doen maar weer die verkeerde dinge.  Wat meer kan ‘n mens dan sê?  Wat meer kan ‘n mens doen.

As jy terug gaan na Hosea toe, dan sien jy dat God sê,

Hos 6:4 Wat sal Ek met jou doen, o Efraim...

‘n Mens kom eenvoudig net op ‘n punt waar jy nie meer iemand kan help wat nie gehelp wil word nie.  Alles wat jy kon doen, het jy gedoen.  Wat meer kan jy doen?  Baie ouers sal weet waarvan ek praat.  Van julle het seker al die moedeloosheid beleef, wanneer jy alles in jou vermoë gedoen het en net eenvoudig op ‘n punt gekom het en nie meer weet wat om te doen nie. 

Dit is Paulus se dilemma met die gemeentes van Galasië.  En al wat hy kan sê is, word soos Jesus.  Want jy sien, ‘n Christen is iemand wat beklee is met die karakter, met die gesindheid, met die gewoontes en met die deugde van Jesus Christus.

Rom 13:14 Maar beklee julle met die Here Jesus Christus, en maak geen voorsorg vir die vlees om sy begeerlikhede te bevredig nie.

Gal 3:26 Want julle is almal kinders van God deur die geloof in Christus Jesus;

27 want julle almal wat in Christus gedoop is, het julle met Christus beklee.

Dit verwys na die dag van jou bekering.  Hoe word ek ‘n kind van God? Deur die geloof in Christus Jesus.  V27 sê, julle is in Christus gedoop.  Dit verwys nou nie na die waterdoop nie.  Dit verwys na die dag wat jy tot bekering gekom het, toe is jy in Christus geplaas. 

Die woord vir doop “baptizo” kan ook vertaal word met “in geplaas”.  Almal wat in Christus geplaas is.  Almal wat in Christus gedoop is, het julle met Christus beklee.  So maw, al die kinders van God het Jesus Christus aangetrek.  Ons moet soos Jesus word.

Uiterlike godsdiens bring nie innerlike verandering nie.  Dit is die Gees van Christus in ons wat os verander.  Die Gees in ons verander ons om soos Jesus te wees.  Ons moet op Jesus fokus en Sy heerlikheid aanshou, dan sal ons verander om soos daardie selfde beeld te word, van heerlikheid tot heerlikheid.

Slot

Prof Johan Malan sê: “...Sondaars soek na ‘n maklike en fisies tasbare manier om tot die Christendom toe te tree sonder om noodwendig hulle lewenstyl te verander. Baie kinders van die Here is ook nie meer met die gewone beskouings oor geestelike groei tevrede nie en soek na buitengewone ondervindings in hulle geestelike lewe. Hulle wil in een, dramatiese oomblik met die Gees gedoop word en ook spesiale gawes kry om hulle vervelige lewe ‘n bietjie op te kikker. Dit open die weg na talle dwalings.

Op hierdie manier word die deur vir die sensuele en die skouspelagtige oopgemaak, en só word die vlees gestimuleer. Dit bevorder ‘n humanistiese selfbeeld wat wel ‘n uiterlike Christelike voorkoms mag hê, maar in werklikheid geen neiging tot ware geestelikheid het nie. Die nuwe gawes en vreemde manifestasies word vir selfverheerliking en ter wille van vermaaklikheid beoefen, en dra geensins tot die uitbreiding van God se koninkryk op aarde by nie.”

http://www.bibleguidance.co.za/Afrartikels/Valindiegees.htm

Die gestalte van Christus in ons

Tema:  Die gestalte van Christus in ons (Gal 4:12-20)

Gal 4:12 Broeders, ek bid julle, word soos ek, want ek is ook soos julle. Julle het my geen onreg aangedoen nie;

13 maar julle weet dat ek ten gevolge van krankheid van die vlees die eerste keer die evangelie aan julle verkondig het;

14 en julle het my beproewing in my vlees nie verag of verfoei nie, maar julle het my ontvang as ‘n engel van God, ja, as Christus Jesus.

15 Wat was dan julle saligprysing? Want ek getuig van julle dat julle, as dit moontlik was, jul oë uitgegrawe en vir my sou gegee het.

16 Het ek dan julle vyand geword deur julle die waarheid te vertel?

17 Hulle ywer vir julle is nie goed nie, maar hulle wil ons buitesluit, sodat julle vir hulle kan ywer.

18 Dit is goed as daar altyd geywer word in ‘n goeie saak en nie alleen wanneer ek by julle teenwoordig is nie,

19 my kinders, vir wie ek weer in barensnood is totdat Christus in julle ‘n gestalte verkry.

20 En ek sou wens om nou by julle teenwoordig te wees en my stem te verander, want ek is buite raad met julle.

In die boek Galasiërs verdedig Paulus die ware evangelie, dat ons geregverdig word deur die geloof, teen ‘n ander valse evangelie wat sê jy word gered deur jou werke. 

Paulus was saam met sy vriend Barnabas op ‘n sendingreistog, en ons lees dat hy ‘n hele paar kerke gestig in die gebied van Galasië.  (kaart) Dit is plekke soos Derbe, Listre, Antiochíë en Ikónium.  Ons lees daarvan in Hand 14.  Hy het hierdie kerke gestig op die basis van die saligheid wat uit genade is, deur geloof alleen.

Maar hy was skaars weg, toe kom daar Jode uit Jerusalem wat sê hulle is Christene en hulle begin om vir die mense te vertel dat om net te glo is nie genoeg nie.  Hulle vertel vir die mense dat geloof is nie genoeg nie en dat hulle besny moet word en die wet moet onderhou.

Paulus het toe daarvan uitgevind en skryf toe vir hulle ‘n brief, dit is nou hierdie brief aan Galasië, wat aan al hierdie gemeentes gestuur is.  En Paulus wil deur hierdie brief vir hulle sê dat hierdie Judeërs wat Joodse rituele en sermonies op die gemeentes wil op lê, verkeerd is, dat hulle moet vashou aan die redding wat deur die genade van Christus kom.  Dit is die boodskap van die boek Galasiërs.

Nou hier in Gal 4 vanaf vers 12, nadat hy vanaf uit ‘n teologiese perspektief sy saak verdedig het, raak hy persoonlik.  Hy spreek sy begeerte teenoor hulle uit en waarsku hulle.  Hy vermaan hulle persoonlik. 

Gal 4:12 Broeders, ek bid julle, word soos ek, want ek is ook soos julle...

KJV

Gal 4:12 Brethren, I beseech you, be as I am; for I am as ye are: ...

“I beseech you”, Ek smeek julle, “word soos ek, want ek is ook soos julle”.  Nou wat probeer hy sê?  Hoe kan hy sê hulle moet soos hy word net soos wat hy soos hulle is?  Nou wat probeer Paulus nog die hele tyd sê in die boek van Galasiërs?  Hy probeer vir hulle sê, hulle is vry van die wet.  Gal 5 sê bv.

Gal 5:1 Staan dan vas in die vryheid waarmee Christus ons vrygemaak het, en laat julle nie weer onder die juk van diensbaarheid bring nie.

En dit is wat Paulus regdeur die hele brief sê.  Moenie aan die wet vashou nie.  En hier praat hy nie van die morele wet van God nie.  Hy praat hier van die seremoniële wette en rituele.  Moenie aan hierdie wette vashou met die doel dat julle dink dat julle daardeur gered kan word nie.  Wees vry van die wet soos wat ek is.

Word soos ek, wees vry van die wet soos ek.  Jy kan nie gered word deur die wet te onderhou nie.  Daar is geen nut om julle onder die Joodse seremonies te bring nie.  Moenie julle onder die juk van diensbaarheid bring nie.  Wees vry in Christus soos ek, leef in die genade van die Here soos ek.  Dit is was Paulus bedoel as hy sê, word soos ek.

Hoekom?  “...want ek is ook soos julle.”  Wat beteken dit?  U sal onthou dat Paulus was ook ‘n Jood, ‘n Fariseër.  Hy het al die wette geken en was diep in die wette.  Maar toe Paulus tot bekering kom, wat het gebeur?

Fil 3:8 Ja waarlik, ek ag ook alles skade om die uitnemendheid van die kennis van Christus Jesus, my Here, ter wille van wie ek alles prysgegee het en as drek beskou, om Christus as wins te verkry

Paulus het al hierdie wette en godsdiens as drek beskou, hy het dit alles prys gegee, om Christus as wins te verkry.  Hy het weggebreek van wettisisme, uit onder die Joodse wet, en hy het soos ‘n heiden geword wat nie ‘n wet het nie.

Hy het die wet as ‘n middel tot redding verlaat en hy het ook die rituele wette en seremoniële wette verlaat as ‘n middel tot heiligmaking.  Hy het na Galasië toe gegaan net soos ‘n heiden wat nie onder die juk van die wettige sisteem is nie.  Hy is vry van die wet en dit is die vryheid wat hy aan hulle verkondig het.

Hoe wil hulle nou na die wet toe gaan as hulle nooit onder die wet was nie.  En hier praat hy van die rituele en seremoniële wette.  So dit is wat Paulus probeer sê.  Hy sê, ek het vry geword van die wet soos een van julle.  Nou wil julle word soos wat ek was toe ek nie vry was nie, terwyl julle nooit ‘n wet gehad het nie.

Paulus sê, Broeders, ek bid julle, ek smeek julle, word soos ek, vry van die wet, want ek is ook soos julle, julle heidene wat vry is van die wet.  Gal 4:12 sê dan verder,

Gal 4:12b ... Julle het my geen onreg aangedoen nie;

Julle het niks verkeerds aan my gedoen nie.  Julle het my goed ontvang.  Julle het nie met my geargumenteer nie.  Julle het my nie van iets verkeerds beskuldig nie.  Julle het my boodskap gehoor en dit aanvaar.  Julle het my met liefde aanvaar.

Wat sê Paulus?  Hoekom draai julle nou teen my?  Wat het gebeur?  Wat het verander?  Toe ek soos een van julle geword het, het julle my geen onreg aangedoen nie. 

Jy sien, toe Paulus in Galasië begin preek het was dit al die Jode wat sy boodskap verwerp het.   Maar die heidene het gesê, kom ons doen dit weer volgende week.  En dit is wat Paulus gedoen het.  Die Heidene het sy boodskap aanvaar en hom geen onreg aangedoen nie.

Maar wat het nou gebeur?  Hoe het hulle skielik so teen hom gedraai?  En dit moes hartsverskeurend gewees het vir Paulus.  Hy het omgegee vir hierdie mense.  Maar hoekom is hulle nou teen hom?  Want hulle het die Judeërs se wettiese godsdiens ingesluk, hoek, lyn en sinker.  Hulle het geval vir die Judeërs.

Dit moes hartseer gewees het vir Paulus; want hy was lief vir hierdie mense.  Dit is wat ons noem “geestelike afvalligheid”, en dit moet die grootste hartseer wees vir enige dienskneg van die Here. 

Hoeveel te meer nie vir Jesus nie.  Hoe moet die Here voel oor mense wat nie Sy reddened genade aanvaar nie en vasgevang word in ‘n wettiese godsdienstige sisteem?  Mense wat dink dat hulle God se genade kan verdien deur hul werke.

Kyk hoe het Jesus gevoel oor Jerusalem.

Matt 23:37 Jerusalem, Jerusalem, jy wat die profete doodmaak en stenig dié wat na jou gestuur is, hoe dikwels wou Ek jou kinders bymekaarmaak net soos ‘n hen haar kuikens onder die vlerke bymekaarmaak, en julle wou nie!

Jesus het geween oor Jerusalem.  God het alles gegee wat Hy moontlik kon gee vir Israel.  Hy het Sy Seun gegee.  Maar hulle wou nie.  Kan jy net indink hoe moet God vandag voel oor geestelike afvalligheid.  Kyk byvoorbeeld na Hosea 11.

Hos 11:1 Toe Israel ‘n kind was, het Ek hom liefgehad, en uit Egipte het Ek my seun geroep.

God noem Israel, Sy kind.

Hos 11:2 Hoe meer die profete hulle geroep het, des te meer het hulle van húlle af weggeloop; hulle het aan die Baäls geoffer en vir die gesnede beelde rook laat opgaan.

Daar is baie ouers wat weet wat dit is om ‘n kind lief te hê en groot te maak so goed as wat hulle kan, en wanneer die kind groot word, draai hy eenvoudig net sy rug op sy ouers en op God.  Ons sien dit gebeur so baie.  Weet jy wat?  God weet hoe jy voel.

Hos 11:3 En Ek self het Efraim leer loop. Hy het hulle op sy arms geneem, maar hulle het nie erken dat Ek hulle genees het nie.

Maw God het Efraim op sy arms geneem en hom geleer om te loop.  Julle weet hoe dit werk.  Jy help die kind en dan nie lank daarna nie, laat jy gaan.  Dan gee die kind ‘n tree hier, slinger daar en DOEF!  Kop op die koffie tafel.  Wat doen jy dan?  Gryp hom in jou arms kyk of hy seergerky het, troos en soen alles reg.  Dit is wat God sê.

Hy het Efraim geleer om te loop en elke keer as hy val, het Hy hulle genees.  Maar hulle het dit nie erken nie.  Hulle het nie geweet dit is God wat hulle gehelp het nie.

Hos 11:4 Met mensebande, met koorde van liefde het Ek hulle getrek; en Ek was vir hulle soos diegene wat die juk van hulle kakebeen af oplig; en Ek het My na hom neergebuig, Ek het hom voedsel gegee.

God beskryf Sy liefde aan Israel en dat Hy omgee.  Hy het aan hulle voorsien.  En die rede waarom God se hart so seer was oor Israel, was juis as gevolg van Sy liefde vir hulle.

Hos 6:4 Wat sal Ek met jou doen, o Efraim; wat sal Ek met jou doen, o Juda? aangesien julle liefde is soos ‘n môrewolk en soos ‘n dou wat vroeg weer verdwyn.

Die hemel ween oor geestelike afvalligheid.  Maar hoor wat sê God oor Israel in hoofstuk 14.

Hos 14:4 Ek sal hulle afkerigheid genees, hulle vrywillig liefhê, want my toorn is van hulle afgewend.

5 Ek sal vir Israel wees soos die dou, hy sal bloei soos ‘n lelie en sy wortels uitslaan soos die Líbanon.

6 Sy lote sal uitsprei, en sy prag wees soos dié van ‘n olyfboom en sy geur soos die Líbanon.

So dink jy daar is hartseer in die hemel?  Verseker.  Maar ek dink dit maak dit net erger wanneer die hartseer gaan oor mense wat beter geweet het.  Om gewilliglik die verkeerd te kies voor ‘n liefdevolle God.  As Jesus so gevoel het en God so gevoel het, voel die Heilige Gees sekerlik ook so.

Ef 4:30 En bedroef nie die Heilige Gees van God nie, deur wie julle verseël is tot die dag van verlossing.

Het jy geweet dat die Heilige Gees bedroef kan word?  Hoe?  Deur sonde.  Die vers voor en na v30 praat oor sonde.  Vandag is God ook bedroef deur Sy kinders se sonde.  Net so voel Paulus dan ook in Gal 4 oor die geestelike afvalligheid.  Hy verstaan dit nie.  Hoe het alles so verander?

Gal 4:13 maar julle weet dat ek ten gevolge van krankheid van die vlees die eerste keer die evangelie aan julle verkondig het.

Wat hier kon gebeur het is dat Paulus die eerste keer toe hy na hulle toe gekom het, hy siek geword het en hy nie ‘n keuse gehad het nie, maar moes bly in Galasië.  En as gevolg daarvan was hy in Galasië en het hy die evangelie aan hulle daar verkondig.

14 en julle het my beproewing in my vlees nie verag of verfoei nie, maar julle het my ontvang as ‘n engel van God, ja, as Christus Jesus.

Ten spyte van wat die siekte ookal was, het hulle hom ontvang as ‘n engel van God, selfs as Jesus.  En dit is waarom Paulus nie verstaan hoekom hulle nou so skielik teen hom gedraai het nie.  Nou het hulle die besnydenis en wettiese godsdiens aanvaar.

Nou, siekte, swakheid en teenspoed was altyd deur die Jode beskou as God wat straf.  Bv. in Joh 9 lees ons van ‘n blinde man.  Die disspels sê,

Joh 9:2 ...Rabbi, wie het gesondig, hierdie man of sy ouers, dat hy blind gebore is?

Maw hoe dink hulle?  Wat is hulle teologiese raamwerk?  Hulle het geglo dat as jy siek is, het jy iets verkeerds gedoen en God straf jou.  Jy onthou wat Job se vriende vir hom gesê het, toe dit so sleg gaan met hom.  Die Jode het dit geglo en ook die heidene.  Die heidene het geglo dat wanneer jy siek is dan is dit die gode wat jou straf.

Toe Paulus deur ‘n slang gebyt is, toe sê die inboorlinge, hy is seker ‘n moordenaar.  Die gode is kwaad vir hom.  Hulle straf hom vir sy misdade.  Dit is hoe hulle dit gesien het.  Maar toe Paulus in Galasië was, en siek was, het hulle hom aanvaar.  Hulle het oor hulle eie teologiese hekkie gespring.  Volgens hul eie teologie kon hulle Paulus bevraagteken het en sy boodskap verwerp het, maar hulle het hom aanvaar.

Hulle kon gevra het, as Paulus ‘n man van God is, en ‘n wonderweker is, waarom is hyself dan siek.  Maar hulle het nie, hulle het hom aanvaar.  Hulle het hom ontvang as ‘n engel van God, as Jesus self.

Hand 13:42 En toe die Jode uit die sinagoge gaan, het die heidene versoek dat daardie woorde op die volgende sabbat tot hulle gespreek sou word.

43 En toe die sinagoge uit was, het baie van die Jode en die godsdienstige Jodegenote Paulus en Bárnabas gevolg. Dié het hulle toegespreek en hulle probeer beweeg om in die genade van God te bly.

44 En op die volgende sabbat het byna die hele stad saamgekom om die woord van God te hoor.

48 En toe die heidene dit hoor, was hulle bly; en hulle het die woord van die Here geprys; en daar het gelowig geword almal wat verordineer was tot die ewige lewe.

49 En die woord van die Here is deur die hele land verbrei.

Die eerste keer toe die apostel Paulus daar aangekom het, het die mense hul arms oopgegooi en hom verwelkom en aanvaar.

Hand 14:8 En in Listre het daar ‘n man gesit wat magteloos was aan sy voete, kreupel van sy geboorte af, en hy het nooit geloop nie.

9 Hy het geluister terwyl Paulus spreek; en Paulus het die oë op hom gehou, en, toe hy sien dat hy geloof het om gesond te word,

10 met ‘n groot stem gesê: Staan regop op jou voete! En hy het opgespring en begin rondloop.

11 En toe die skare sien wat Paulus gedoen het, verhef hulle hul stem en sê in Likaónies: Die gode het soos mense geword en neergedaal na ons toe.

Dit het gebeur toe Paulus in Galasië, in Listre was en hy self siek was.  Hulle het hom soos ‘n koning ontvang, maar hy moes hulle reg help.  En nou dat hy aan hulle skryf en hulle reg help, hou hulle nie van sy boodskap nie.

Jy sien, mense is wispelturig.  Daar is baie mense wat van jou sal hou totdat jy iets sê wat hulle nie wil hoor nie.  Wanneer dit kom by die Woord van God, kan jy egter nie kies en keur nie.  Jy kan nie sekere gedeeltes vir jouself vat en ander gedeeltes vermy omdat jy nie daarvan hou nie.  Ons moet die hele Woord van God aanvaar en predik.  Kyk wat gebeur verder.

Kom ons gaan terug na Gal 4,

Gal 4:15 Wat was dan julle saligprysing?...

Wat sê Paulus?  Hy sê, wat het geword van julle saligprysing? Wat het geword van julle vergenoegdheid?  Julle was so tevrede.  Waar is julle vreugde?  Kan julle nie onthou hoe goed julle die boodskap aanvaar het en hoe bly julle was nie?  Wat gaan nou aan?  As Paulus gehuil het, was dit sekerlik hier.

15 ...Want ek getuig van julle dat julle, as dit moontlik was, jul oë uitgegrawe en vir my sou gegee het.

Is julle nie nou meer te vrede net met die genade van die Here nie?  Is julle nie te vrede met geloof alleen nie? As jy teruggaan na v11 dan sê Paulus,

Gal 4:11 Ek vrees vir julle dat ek miskien tevergeefs aan julle gearbei het.

Paulus wonder of hy nie dalk sy tyd met hulle gemors het nie.

Gal 4:16 Het ek dan julle vyand geword deur julle die waarheid te vertel?

Is dit nie interessant dat mense net na jou sal luister solank as wat jy vir hulle vertel wat hulle wil hoor?  Dit is baie maklik om ‘n gemeente te laat groei...preek vir die mense wat hulle wil hoor.  Streel mense se ore.

Nou, ek is nie hier om vir mense te preek wat hulle wil hoor nie.  Ek is hier om vir mense te preek wat hulle moet hoor.  En as dit sou beteken dat ek vyande daardeur gaan maak, dan is dit so.

Somtyds is mense baie bly om die boodskap van die evangelie te hoor en aanvaar dit met blydskap, maar hulle doen dit vir selfsugtige redes.  Wanneer dit ‘n prys gaan kos, dan is hulle nie bereid om alles vir God te gee nie. 

In hierdie geval is dit mense wat nie te vrede is net met die genade van die Here nie.  En wanneer hulle die waarheid hoor, dan draai hulle hul rug op dit. 

Hoekom sou mense eerder ‘n wettiese godsdiens verkies bo die genade van die Here?  Want ‘n uiterlike goedsdiens is tasbaar.  Jy kan dit sien.  Jy kan x aantal dinge doen en dit skep ‘n gevoel van super-geestelikheid.

Paulus waarsku hulle en hy vertel hulle reguit in v17.

Gal 4:17 Hulle ywer vir julle is nie goed nie, maar hulle wil ons buitesluit, sodat julle vir hulle kan ywer.

KJV
Gal 4:17 They zealously affect you, but not well; yea, they would exclude you, that ye might affect them.

Hulle maak ‘n groot bohaai oor julle.  Hulle is ywerig oor julle.  Hulle kom vertel julle, julle is die wonderlikste mense.  Hulle het ‘n diepe besorgdheid oor julle.   Hulle wen julle oor met vleitaal.  Hulle is skielik julle beste vriende.  Maar hulle ywer vir julle is nie goed nie.

Hulle het nog nooit ‘n eerlike rede gehad of ‘n goeie doel gehad nie.  Hulle doel was om julle buite te sluit.  Om julle van die genade uit te sluit, van die seën wat in die genade is uit te sluit, sodat julle vir hulle kan ywer.  Hulle wil julle deel maak van hulle sisteem, sodat jy na hulle kan opkyk en hulle kan gehoorsaam.  Dit is wat Paulus sê.

Die Judeërs wou die Galasiërs aan hulle Joodse manier gehoorsaam maak.  Hulle wou hulle beheer.  Hulle plaas hulle weer onder diensbaarheid. 

Die waarheid is dat hulle nie regtig omgegee het vir die Galasiërs nie.

Gal 6:12 Almal wat ‘n mooi vertoning in die vlees wil maak, dié dwing julle om julle te laat besny net om nie ter wille van die kruis van Christus vervolg te word nie.

Dit is presies wat vandag gebeur.  Mense is daarop uit om ander te vang met hulle eie sisteme, terwyl die Bybel sê ons is tot vryheid geroep.

Gal 4:18 Dit is goed as daar altyd geywer word in ‘n goeie saak en nie alleen wanneer ek by julle teenwoordig is nie,

Paulus sê, daar is niks met ywer verkeer nie, veral nie as dit vir ‘n goeie saak is nie.  Paulus is nie kwaad omdat hulle nie hom volg nie.  Hy is kwaad omdat hulle vir die verkeerde dinge geywer het.  Paulus is nie jaloers nie, dit gaan vir hom oor die waarheid.  Solank Christus in hulle gestalte verkry.

Gal 4:19 my kinders, vir wie ek weer in barensnood is totdat Christus in julle ‘n gestalte verkry.

Dit is alles waaroor dit gaan.  Dat Christus in julle gestalte sal verkry.  Hy sê ek ervaar hierdie pyn, want ek wil sien dat dit alles daaroor sal gaan, dat Christus in julle gestalte verkry.  Dat julle sal groei tot ‘n volwasse man, tot die mate van die volle grootte van Christus.  En dit is die doel van elke Christen se lewe, om soos Jesus te wees.  Om gelykvormig te word aan die Seun van God.

Slot

Rom 13:14 Maar beklee julle met die Here Jesus Christus, en maak geen voorsorg vir die vlees om sy begeerlikhede te bevredig nie.

Ons moet die gestalte van Jesus hê, ons moet meer soos Hy word.  Ons moet nie ‘n godsdienstige gestalte aanneem nie.  Sommige mense wanneer hulle by ‘n kerk aansluit, dan neem hulle die gestalte van daardie kerk aan.  Hulle gaan deur al die motions.  Got the T-shirt, got the bumper sticker.

Nee! Word soos Paulus, vry van godsdienstige wette.  Ons is gered uit genade deur die geloof.  Nie deur werke nie.  Christus is die einde van die wet tot geregtigheid vir die wat glo.  Dit gaan oor ‘n lewende verhouding met die Jesus Christus.

Gaan die wegraping 21 Mei 2011 plaasvind?

Tema: Gaan die wegraping 21 Mei 2011 plaasvind?

(video) Judgement Day 21 May 2011

Soos ons nou net gesien het is Harold Camping die persoon wat hierdie datum uitgewerk het.   Hoe kom hy by hierdie datum uit?

Volgens hom het Noag se vloed 4990 vC plaasgevind.  God het vir Noag gesê dat oor 7 dae gaan die vloed begin.  Die vloed spreek dan van God se oordeel.  Die vloed is dan ‘n tipe van God se finale oordeel aan die einde.  Die 7 dae is ‘n skadubeeld van 7000 jaar, want in 2 Pet 3:6-8 sê dit mos dat vir die Here is 1 dag soos ‘n duisend jaar en ‘n duisend jaart soos 1 dag.

As jy dan 4990 + 2011 jaar = 7001 jaar.  Die jaar 0 word dan afgetrek as 1 jaar en dit gee ons 7000 jaar.  Die 17e dag van die 2e maand volgens die Joodse kalender is dag toe God die deur van die ark toegesluit het.

Nou volgens Harold Camping het die kerkeeu geëindig in 1988 en het die groot verdrukking begin van 23 jaar.  Die kerkeeu het begin op 22 Mei, die dag van Pinkster in die jaar 33 nC. 1955 jaar later het dit geëindig op die 21e Mei 1988 die dag voor Pinksterdag.

Die Heilige Gees het hier al die kerke verlaat en Satan het in die kerke ingekom.  Dan sê hy dat die Bybel leer ons dat 23 jaar later op 21 Mei 2011, die dag van oordeel sal aanbreek.  Dit is ook dan dieselfde dag op ons kalender as die 17e dag van die 2e maand toe God die ark toegesluit het.

Kom ek begin deur ‘n stelling te maak:

Enigiemand wat datums voorspel vir die wederkoms of die einde van die wêreld bewys daardeur dat hy nie die Bybel reg verstaan nie.  Daarom is daar geen twyfel dat hierdie datum 21 Mei 2011 wat voorspel is reeds ‘n aanduiding is dat dit ‘n valse profesie is.

Matt 24:36 Maar van dié dag en dié uur weet niemand nie, ook die engele van die hemele nie, maar net my Vader alleen.

Wie is Harold Camping?  Hy is ‘n baie invloedryke persoon.  Hy is die president van “Family Radio Network” en besit 150 radio stasies.  So daar is baie mense, miloene mense regoor die wêreld wat na hierdie ou luister.  Iewers het ek gelees dat hy 200 miljoen volgelinge het.

Sy siening van die Bybel is Amillenialisme, hy is gereformeerd en hy glo in vervangings teologie.  Nou wat beteken dit alles.  Amillenialisme sê daar is nie ‘n letterlike duisend jaar van vrede nie.  Maw Jesus gaan nie letterlik op aarde vir ‘n 1000 jaar regeer nie. 

Dan is hy ook gereformeerd, en dit beteken hy is ‘n Kalvinis en glo in die uitverkiesings leer, maw God het net ‘n sekere groep mense uitverkies om hemel toe te gaan, en in hierdie geval is dit hy en al sy volgelinge wat uitverkies is. 

En vervangings teologie beteken dat die Kerk het die plek van Israel vervang.  Dit beteken die kerk is nou die geestelike Israel.  En God is klaar met die Jode.  Al die beloftes wat God vir Israel gegee het, word nou op die kerk van toepassing gemaak.

En dit alles is klaar ‘n groot problem.  So sy voorspelling wat hy maak, is uitgewerk op ‘n verkeerde teologiese raamwerk.  Hy het voorspel dat die wegraping sal plaasvind op 21 Mei 2011.  Harold Camping is egter nie enigste wat al datums voorspel het nie en daarom is hy deel van vele ander valse profete wat al die einde van die wêreld voorspel het.

Daar was byvoorbeeld William Miller wat die stigter was van ‘n eindtyd beweging en hy het gesê die Here kom tussen 1843 - 21 Maart 1844.  Sy volgelinge het al hul besittings verkoop, mooi wit klere aangetrek en by die heuwels gaan staan en wag.  Niks het gebeur nie.  Sy volgelinge het ‘n nuwe datum voorspel op 22 Okt 1844 en toe die Here nie kom, het die beweging tot ‘n einde gekom.  Hierdie volgelinge word toe sewendedaagse adventiste geword.

Dan was daar die bekende “Watchtower Society: Jehovah’s witnesses”.  Hier is ‘n artikel van hulle wat sê, “why are you looking forward to 1975?”  Hulle het geglo dit is wanneer Jesus weer gaan terug kom, maar hulle Jesus is die aartsengel Migael, maw hulle het ‘n ander Jesus. 

Hulle is bekend vir al hulle datums.  Eers was dit 1888, daarna 1914, toe sê hulle het geestelik gekom. 

In 1925 het hulle miljoene dollars ingesamel om ‘n groot mansion te bou vir Abraham, Isak en Jakob en toe hulle nou nie opdaag nie, raai wie trek toe in in die mansion?  Die president van die Watchtower Society.  Dis nice!  Dan was daar ook die voorspelling in 1975 en 1984.

Dan was daar ook Edgar C. Whisenant, ‘n oud-ingeneur van Nase, en hy het voorspel dat die wegraping in Sep 11-13 1988 gaan gebeur.  TBN het hom ondersteun en onderskryf en hulle programme uitgesaai om mense voor te berei op die wegraping.  Toe dit nou nie gebeur nie het hy nog drie ander datums gegee, in 1989, 1993 en 1994.

Harold Camping het al in die verlede ook ‘n datum voorspel.  Hierdie is nie sy eerste datum nie.  Sy eerste datum wat hy voorspel het was 6 September 1994, en wat het gebeur?  Niks!  Hy sê toe dat hy ‘n wiskundigings berekenings fout gemaak het.  Die regte datum is eintlik 21 Mei 2011.  Dit is nou Saterdag.  So is jy gereed?

Ons het gesien dat die probleem wat al hierdie ouens het wat datums probeer voorspel is dat hulle die Bybel nie reg verstaan nie.  Nou, met sekere dinge is Harold Camping reg, maar dié dinge wat reg is word vermeng met verkeerde dinge.  En dit maak hom ‘n valse profeet.

Hy is reg wanneer dit kom by die feeste wat gaan oor Jesus Christus, maar sy amillennialisme en Kalvinisme plaas hom op ‘n verkeerde weg.  Die dinge wat van toepassing is op Israel en Jesus, maak hy van toepassing op die kerk.

Hy verwys na die feeste van trompette en ja, dit hou verband met die sewe trompette in Openbaring, maar hy maak die fout deur dit op die wegraping van toepassing te maak.

 Jy sien die sewe trompette in Openbaring vind eers plaas na die wegraping en na die Antichris op die voorgrond tree wanneer hy ‘n 7 jaar vebond gaan sluit met Israel vlg. Dan 9, en iewers in die middel van die sewe jaar gaan die sewe trompette begin, maar daar is nie ‘n manier om eers te weet wanneer die trompette gaan begin nie

Kom ons kyk gou na die feeste:

Wanneer is die paasfees, die fees van ongesuurde brode, vervul op Jesus?  Die kruisiging.  Sy verraad, Sy verhoor, Sy kruisiging, dit was alles ‘n vervulling van dit wat die paasfees uitbeeld.

Wanneer is die pinksterfees vervul?  50 dae na die kruisiging en dit was die begin van die transisie typerk van die wet na genade.  So die verband was nie met die kerk so ver dit die heidene betref nie, maar dit was met Israel.  Die heidene het nie ‘n wet gehad nie.

As jy teruggaan na Hand 2, sal jy sien dat daar nie heidene was nie, maar net Jode.  Hulle het van verskillende lande gekom, maar hulle was almal Jode.  Ons moet dit nie vergeet nie. 

Die fees van trompette het te doen met die Jode en met Jesus en nie met die kerk nie, so die trompette van Openbaring het ook weer met die Joodse volk te doen en nie die kerk nie, want die kerk sal reeds weggeraap wees en by die Here wees voor die 7 jaar groot verdrukking begin.

Die dag van versoening, is die nuwe jaar van die Joodse kalender en dit sal vervul word wanneer hulle na Hom sal kyk wie hulle deurboor het en die nuwe jaar van 1000 vrede aanbreek.

Sag 12:10 Maar oor die huis van Dawid en oor die inwoners van Jerusalem sal Ek uitgiet die Gees van genade en smekinge; en hulle sal opsien na My vir wie hulle deurboor het, en hulle sal oor Hom rouklaag soos ‘n mens rouklaag oor ‘n enigste seun en bitterlik oor Hom ween soos ‘n mens bitterlik ween oor ‘n eersgebore kind.

Hierdie is die vervulling van die fees van die dag van versoening en dit sal gebeur by Jesus se wederkoms.  Dit het te doen met Israel en Jesus.

Die huttefees sal eers in die 1000 jaar vrederyk vervul word.  Dan sal die tabernakel van God by die mense wees.  Dan sal God by hulle woon en hulle sal Sy volk wees.

So daar is sekere waarhede in dit wat Camping sê oor die feeste, maar die feeste hou verband met Jesus en Israel en nie met Jesus en die kerk nie.

Soos al die ander valse profete, sê Camping dat as jy nie glo in sy voorspelling nie, dan is jy nie gered nie.

(video)

Maw as jy nie saamstem met Camping nie, is dit ‘n bewys dat jy nie die wil van God glo nie en jy is dan ook nie gered nie.  So om alleen in Jesus Christus te glo is nie genoeg nie.  Jy moet ook in sy datum glo.  Dit is om die kruis plus te verkondig.  Die kruis alleen is nie genoeg nie.

Kom ek voeg net dit by, daar is kerke wat sê, as jy nie gedoop is nie, dan is jy nie gered nie.  Is dit so?  Nee!  Jesus het dan vir die misdadiger aan die kruis gesê, vandag sal jy saam met my in die paradys wees en hy was nie gedoop nie.

Daar is ander kerke wat sê, as jy nie in vreemde tale praat nie, het jy nie die Heilige Gees.  En daarom is jy nie gered nie.  Is dit waar?  Nee!  Volgens Rom 8:9 het elke wedergebore kind van God die inwonende Heilige Gees. En nêrens lees ek dat jy moet in tale praat as bewys dat jy die Heilige Gees ontvang het nie.

Daar is dan ander wat sê, as jy nie Saterdag op die Sabbat kerk toe gaan nie, dan is jy nie gered nie.  Die sewendedaagse advitiste sê dat as jy Sondag kerk toe gaan, dan het jy die merk van die bees.  Is dit waar? Nee!

Dit is alles die kruis PLUS PLUS PLUS...

Wat sê die Bybel?

Hand 16:31 Toe sê hulle: Glo in die Here Jesus Christus en jy sal gered word, jy en jou huisgesin.

Rom 10:9 As jy met jou mond die Here Jesus bely en met jou hart glo dat God Hom uit die dode opgewek het, sal jy gered word;

10 want met die hart glo ons tot geregtigheid en met die mond bely ons tot redding.

Niks van doop of tale of sabbat nie of in datums glo nie.  Luister!  Daar is niks wat jy kan doen om gered te word nie.  Christus het dit klaar vir jou gedoen.  Jy kan nie nog werke byvoeg by dit wat Jesus gedoen het nie.  Dit is nie die kruis PLUS nog iets anders nie.

Ons kry ‘n voorbeeld in die Bybel van ‘n spesifieke gemeente waar daar ook ouens was wat verkondig het dat die oordeelsdag aangebreek het.  Die gemeente van Thessalonika.

2 Thes 2:1 Maar ons vra julle, broeders, met die oog op die wederkoms van onse Here Jesus Christus en ons vereniging met Hom,

2 om nie gou julle verstand te verloor of verskrik te word nie—deur gees of deur woord of deur brief wat van ons afkomstig sou wees—asof die dag van Christus al daar is.

3 Laat niemand julle op enige manier mislei nie, want eers moet die afval kom en die mens van sonde geopenbaar word, die seun van die verderf

Paulus sê hier is mense wat hul verstand verloor en verskrik raak.  Dit is wat ook nou gebeur.  Mense verkoop alles en koop ‘n trok en ry die land vol om mense te waarsku van die oordeelsdag 21 Mei 2011.  Hulle gaan aan asof die dag van die Here, die oordeelsdag daar is.

Dan sê Paulus, God het ons nie ‘n gees van vreesagtigheid gegee nie, maar van krag, liefde en selfbeheersing.  Ons dien nie God omdat ons bang is nie.  Ons dien God omdat ons Hom liefhet. 

Paulus sê dat die afval moet eers kom, die mens van sonde, die seun van die verderf.  Dit is die antichris.  Die oordeelsdag kan nie aanbreek as die antichrist nie op die voorgrond getree het nie.  Dit het nog nie gebeur nie.

Slot

Wat my bekommerd is dat hierdie 21 Mei 2011 voorspelling gaan nie meer Christene maak nie, maar eerder meer mense laat wegdraai van die kerk.  Daar is miljoene mense wat 22 Mei gaan opstaan en besef dat hulle verkeerd was, en op die ou einde gaan hulle niks met die Bybel en niks met God te doen wil hê nie.  Nie omdat hulle gered was en nou verlore gaan nie, maar omdat hulle geloof in die verkeerde dinge was.

Ons geloof, die ware Christen geloof is in Jesus Christus, die Seun van God wat vlees geword het en onder ons kom woon het.  Hy het ‘n sondelose lewe geleef en het aan die kruis my en jou sondestraf gedra. 

Maar dit is nie al nie, Hy het opgestaan en sit aan die regterhand van God die Vader en is ons Voorspraak by die Vader.  Maar daar kom beslis ‘n dag en datum wanneer Hy weer sal terug kom.  Dit kan volgende week 21 Mei wees, dit kan more wees, dit kan vandag wees.

Elke mens moet nou seker wees of sy saak met God reg is.